अकोला : फेब्रुवारी महिन्यातील व्हॅलेंटाईन्स वीक हा अनेकांसाठी विशेष असतो. त्यातल्या त्यात प्रपोज ‘डे’ हा तर अधिक खासचं. आपल्या आवडत्या व्यक्तीला मनातील भावना सांगण्याचा हा दिवस. या दिवसांपासून सुरू झालेल्या वाशिम जिल्ह्यातील एका जोडप्याची खासचं लव्हस्टोरी. या प्रेमकथेत अजबगजब गोष्टी घडल्या. इथं चक्क तरुणीनेच तरुणाला प्रपोज केला. दोघे विवाहबंधनातही अडकले, पुढं नातेवाईंकांसह समाजाकडून प्रचंड विरोधही झाला.

लग्नानंतर परिस्थिती अत्यंत बिकट होती. भाड्याच्या खोलीत राहून दोघांनी संसार उभा केला. त्यानंतर तिने अभ्यास करून स्वतःला घडविले. सोबतच पतीनंही अभ्यासाला सुरूवात केली. यात पुढे यशाने त्यांचं आयुष्य बदलून टाकले. ही प्रेमाची गोष्ट आहे आशिष इंगळे आणि गीतांजली इंगळे (निकम) यांची. वर्ष २००१ चं… वाशिमचे आशिष सुरेश इंगळे. कुटुंबाची परिस्थिती अत्यंत बिकट. वडिलांचा व्यवसाय म्हणजे जेवणाचा डब्बे पोहचवण्याचा. आशिष’नं बारावी पर्यंतचे शिक्षण पूर्ण करून वाशिममधीलच आर.ऐ.कॉलेजमध्ये ‘बीए’ फर्स्टइयरला प्रवेश घेतला. कॉलेजच्या महिन्याभरात आशिष’च्या आयुष्यात एक प्रसंग घडला. तिथूनच सुरुवात झाली एका नव्या वाटचालीची.

वाशिम जिल्ह्यात ‘क्लास’वन’ अधिकारी म्हणून बदलीवर प्रकाश निकम यांची नियुक्ती झाली. बदलीनंतर त्यांचे कुटुंब वाशिम शहरात स्थलांतरित झालं. निकम यांची मुलगी गीतांजली हिनेही आर.ऐ.कॉलेजमध्ये ‘बीए’ फर्स्टइयरला एडमिशन घेतली. त्यानंतर कॉलेजमध्ये इतर विद्यार्थ्यांसह आशिष सोबत’ही तिची मैत्री झाली. आशिषला पाहताक्षणी ‘ती’ आवडू लागली. मैत्रीत जवळपास सहा ते सात महिने उलटून गेले. परंतु आशिषचा स्वभाव हा अगदी साधा आणि सरळ, न बोलका होता. त्यामुळे प्रेमाचा धाडस करणं लांबच होतं.

थेट तिनेच एक पाऊल उचललं अन्…
गीतांजली’ला देखील आशिष आवडू लागला. पण तिलाही धाडस करू वाटत नव्हतं. पण आशिषच्या न बोलता स्वभावामुळे तिने एक धाडस केलं. गीतांजलीला टीव्हीवरील नाटकांची मालिका पाहण्याची खूप आवड होती. त्यामुळे एका मालिकांमध्ये प्रपोज करताना बघितलं. एखाद्या कहाणी प्रमाणे तिनेही प्रपोज करण्याचं निश्चित केलं. फेब्रुवारी (२००१) महिन्याला सुरुवात झाली अन् त्यातल्या त्यात व्हॅलेंटाईन्स वीक’चा सप्ताह लागला. तिच्या मनातं प्रेमाच्या कल्पना फुलल्या आणि ‘प्रपोज ‘डे’ला प्रेमाचा इझहार झाला.

आशिष आणि गीतांजली हे दोघेही इंग्लिश विषयांसाठी खाजगी शिकवणीला जात होते. हे तर आशिष’च्या मित्रांकडून तिला कळलं होतं की त्याचंही आपल्यावर प्रेम आहे. मग, तिने एका कागदार आशिष’ला चिठ्ठी लिहिली. त्यात तिने म्हटलं की ‘आशिष मला तू खूप आवडतोय, तुझ्यासोबत असताना दिवस कसा जातो हेही कळतं नाहीये, माझं तुझ्यावर प्रेम आहे आणि मला लग्न करायचं आहे. तुझे माझ्यावर प्रेम आहे का? असेल तर मला हो म्हण. मला तर माहिती आहे, तुझा स्वभाव तेवढं तू धाडस करू शकत नाहीये. एक काम कर, जर तुझं माझ्यावर प्रेम असेल तर उद्या ट्यूशनला पिंक कलरची टिशर्ट घालून ये. अशाप्रकारे तिने प्रेमाचा प्रस्ताव ठेवला.

आशिषला पण तिला हो म्हणायचं होतं. राहायला प्रश्न आता टी-शर्टचा त्याच्याकडे पिंक टी-शर्ट नव्हती, नवं टी-शर्ट घेण्यासाठी पैसेही नव्हते. त्यांनी थेट सायकलनं प्रत्येक मित्राचं घर गाठलं. प्रत्येकाकडे टी-शर्ट मागू लागला. अखेर मित्र छोटू भालेराव याच्याकडे टी-शर्ट मिळालं अन् तो पिंक टी-शर्ट घालून ट्यूशनला पोहचला. आशिषला पिंक टी-शर्ट वर पाहून गीतांजली हिचा आनंद गगनात मावेनासा झाला. इथून सुरुवात झाली त्यांच्या प्रेमाला.

अडीच वर्ष घेतल्या प्रेमाच्या आणा-भाका..
आशिष आणि गीतांजलीला प्रेमात तब्बल अडीच उलटून गेले. यादरम्यान त्यांनी कॉलेजचे राष्ट्रीय सेवा योजना अंतर्गत कॅम्प तसेच विविध उपक्रमात दोघेही सोबत सहभाग घ्यायचे. दोघांना बाहेर भेटणं तर कठीणच होतं. त्यामुळे ते नेहमी रिकाम्या वेळेत कॉलेजमध्येच बोलायचे असा त्यांचा संपर्क असायचा. कधीकाळी आशिष एक मित्र म्हणून तिच्या घरी देखील जात असे.

प्रेमाच्या दिवसात घडला संघर्ष, मग घेतला एकच निर्णय
वर्ष २००३…. कॉलेजचे दिवस झाले पूर्ण झाले. पुढं दोघांनेही एम.एस.डब्ल्यू’ला एडमिशन केली. तितक्यात आशिषनं पोलीस भरती मारली आणि पोलीस शिपाई म्हणून रजूही झाला. पोलीस ट्रेनिंग सुरू असताना गीतांजलीच्या एका मैत्रीणीणं दगा दिला. तिच्या घरी दोघांच्या प्रेमाबद्दल कळवलं, घरून प्रचंड विरोध झाला अन् तिच्या लग्नाचा विचार केला. परंतु तिचा आशिष सोबत लग्न करण्याचा हट्ट कायम होता. घरच्यांकडून मात्र विरोध कायम राहिला. गीतांजलीनं घरातीलच लँडलाईनवरून आशिषसोबत अनेक वेळा संपर्क करण्याचा प्रयत्न केला, पण त्याच्याकडे मोबाईल नव्हता. एकेदिवशी आशिषनं पोलीस प्रशिक्षण केंद्रबाहेरील एका STD बूथ वरून तिच्या लँडलाईन फोन केला. तिने रडत रडत सर्व घडलेला प्रकार सांगितला.

पोलीस प्रशिक्षण केंद्रातून दिवाळीच्या सुट्ट्या मिळाल्या. आशिष घरी पोहचला. तिने आशिषजवळ लग्न करण्याचा हट्ट केला आणि त्याने धाडस करत कोर्ट मॅरेजही (२१ ऑक्टोंबर २००३) केलं. मोठ्या हिमतीने आशिषनं याची माहिती तिच्या कुटुंबीयांना दिली. तेव्हा तिच्या वडिलांनी स्पष्ट लग्नाला नकार देत गीतांजलीसोबत कायमचा संपर्क तोडला असल्याचं म्हटलं. दरम्यान आशिषच्या घरच्यांनी या लग्नाला स्वीकारलं, अन् घरात घेतलं. आणि दोघांनी संसार उभा केला तिच्या धाडसनं. अख्खं आयुष्य पालटलं.

गीतांजलीसोबत एक प्रसंग घडला, अन्…
वर्ष २००७… दोघांचे शिक्षण पूर्ण झालं आणि गीतांजली अभ्यासात अगदी हुशार. परिस्थिती हालाखीची असल्यामुळे आशिषच्या पगारात दोघांचे अनेक स्वप्न अधूरे राहायचे. तिच्यासोबत घडलेल्या त्या एका प्रसंगांनं तिच्या आयुष्याला नवी वाटचाल द्यायचं तिने ठरवलं. हा प्रसंग होता, लग्नाच्या पहिल्याच वाढदिवसा दिवशी दोघांनी एका रेस्टॉरंटमध्ये जायचं निश्चित केलं. दोघांनी पावभाजी सांगितली, पण एक्स्ट्रा पाव घेण्यासाठी सुद्धा त्यांच्याकडे पैसे नव्हते, हेच पाहून तिने एमपीएससी करण्याचा निर्णय घेतला. अभ्यासही सुरु केला. सोबतचं आशिषचा अभ्यास घेतला. २००७ मध्ये तिने एमपीएससी मारली आणि आदिवासी विभागात अधीक्षक म्हणून रुजू झाली. पुन्हा परीक्षा देत आदिवासी विभागात गृहपाल आणि पुढं अकोल्यात एकात्मिक आदिवासी विकास प्रकल्प कार्यालयात सहाय्यक प्रकल्प अधिकारी पदावर रजू झाली. इकडं आशिषनं २०१० मध्ये पीएसआय म्हणून रजू झाला. सद्यस्थित आशिष हे अकोला पोलीस प्रशिक्षण केंद्रात पोलीस निरीक्षक या पदावर आहे.

ज्यांनी नाकारले तेच आता दोघांकडून…
दोघांच्या प्रेमाला समाजाकडून तसाच नातेवाईकांकडून प्रचंड विरोध झाला. कारण त्यांच्या लग्नाला जात आडवी येत होती. आशिष ‘तेली’ आणि गीतांजली हे ‘कुणबी पाटील’ जातीची. त्यामुळे समाजाकडून लग्नाला तीव्र विरोध होत होता. त्यांच्या यशाचं शिखर पाहता ज्या समाजानं त्यांना नाकारले तेच लोक आज त्यांच्याकडून सल्ले घेताहेत अनेक कार्यक्रमाला बोलावत त्यांना मोठा सन्मान देत आहेत. दोघांनी आपापली स्वप्ने पूर्ण केले, पार्थ आणि सई असे दोन मूल असून दोघेचेही शिक्षण सुरू आहे. आज सद्यस्थित हे जोडपं आनंदायी आयुष्यात जगत आहे, त्यांच्या पुढील आयुष्याला महाराष्ट्र टाइम्स करून खूप खूप शुभेच्छा.