मुंबई: विमानतळालगतच्या इमारतींच्या उंचीसंबंधीच्या निकषांतर्गत भारतीय विमानतळ प्राधिकरणाने मागील वर्षभरात ८५९ इमारतींना परवानगी नाकारली आहे. मात्र, त्याचवेळी ८६३ इमारतींना परवानगी प्राप्तदेखील झाली आहे. तर काही स्वयंचलित ‘ना हरकत’ देण्यात आले आहेत.

छत्रपती शिवाजी महाराज आंतरराष्ट्रीय विमानतळ परिसरातील इमारतींचा विषय मुंबईसाठी भिजत घोंगड्यासारखा झाला आहे. एकीकडे सध्या कुठल्याही उंच टॉवर उभारणीला भारतीय विमानतळ प्राधिकरणाकडून (एएआय) परवानगी मिळविण्यात अडचणी येत असतानाच दुसरीकडे विलेपार्ले, सांताक्रूझ पूर्व भागातील मोडकळीस आलेल्या इमारतींचा पुनर्विकास वाढीव चटई क्षेत्राद्वारे उंचीच्या निर्बंधांमुळे अडकला आहे. यासाठीच उंचीची मर्यादा शिथिल करण्यासंबंधी राज्याच्या अतिरिक्त सचिवांनीदेखील मागील महिन्यात केंद्रीय नागरी हवाई वाहतूक सचिवांना पत्र लिहिले आहे. या पार्श्वभूमीवर उंचीच्या या मर्यादा काय व कशा याबाबत ‘महाराष्ट्र टाइम्स’ने हवाई नियंत्रण कक्षाशी संबंधित असणाऱ्यांशी चर्चा केली.

याबाबत हवाई नियंत्रण कक्षातील उच्चाधिकाऱ्यांनी सांगितले की, ‘सर्व परवानग्या या अक्षांश व रेखांशाच्याआधारे दिल्या जातात. संबंधितांना ही सर्व माहिती व जीपीएसआधारित नकाशांच्या आधारे स्वत:च्या इमारतीची नेमकी जागा ऑनलाइन पद्धतीने भरावी लागते. भारतीय विमानतळ प्राधिकरणाने रंगांवर आधारित संकेतांक तयार केले आहेत. हे संकेतांक विविध रंगांनुसार किती उंचीची मर्यादा त्या संबंधित भागात आहे, हे निश्चित करतात. त्यानुसार संबंधितांना उंचीची परवानगी दिली जाते.’

या प्रणालीला ‘नो ऑब्जेक्शन प्रमाणपत्र ऑटोमेटेड सिस्टीम’ (एनओसीएएस) असे नाव आहे. यासाठी एएआयने प्रत्येक प्रादेशिक कार्यालयात ‘एनओसीएएस’ हा स्वतंत्र विभाग उभा केला आहे. या विभागाकडून जवळपास संपूर्ण महामुंबई प्रदेशातील इमारती, मोठे हायमास्ट व अन्य टॉवर्ससंबंधी परवानगी देण्याबाबत अक्षांश व रेखांशाच्या आधारे परवागी दिली जाते. मागील वर्षभरात या विभागाने संपूर्ण महामुंबई प्रदेशातील ८६३ इमारतींना असे ना हरकत प्रमाणपत्र दिले आहे. तर ३५ इमारतींना स्वयंचलित ना हरकत प्रमाणपत्र प्राप्त झाले आहे.

२२ ते १५० मीटर उंचीपर्यंत सात टप्पे

उंचीबाबत परवानगी देण्यासंबंधी एएआयने एकूण सात टप्पे रंगांच्या संकेतांकानुसार निश्चित करण्यात आले आहेत. हे टप्पे २२ मीटर, ३० मीटर, ४० मीटर, ६० मीटर, ९० मीटर, १२० मीटर व १५० मीटर असे आहेत. यानुसार त्या भागात समुद्र सपाटीपासून अधिकाधिक तेवढ्याच उंचीपर्यंतच्या बांधकामे, टॉवर, इमारती, हायमास्टला परवानगी असेल.

नवी मुंबईसह तीन विमानतळांचा समावेश

उंचीबाबत परवानगीसाठी येत्या काळात सुरू होण्यासाठी सज्ज असलेल्या नवी मुंबई विमानतळासह मुख्य विमानतळ व जुहू विमानतळाचादेखील समावेश आहे. या तिन्ही विमानतळांच्या दृष्टीने रंगांचे संकेतांक निश्चित करण्यात आले आहेत. www.nocas2.aai.aero/nocas या संकेतस्थळावरून ही माहिती मिळवता येईल.

असे आहेत रंगांचे संकेतांक

गुलाबी : एएआयकडून ना हरकत प्रमाणपत्र अत्यावश्यक

राखाडी : २२ मीटर

पिवळा : ३० मीटर

आकाशी : ४० मीटर

जांभळा : ६० मीटर

तपकिरी : ९० मीटर

अबोली : १२० मीटर

पोपटी : १५० मीटर