सम्राट चौकातील व्यापारी बाहेती यांचा मुलगा सर्वेश बाहेती (१९) हा २३ डिसेंबर २०१३ रोजी सकाळी ६ वाजता अवंतीनगर येथील जीमला मोटारसायकलवर जात होता. तो कारंबा नाका येथील ब्रीजजवळील गतिरोधकजवळ आला असता चौघांनी त्याच्यासमोर मोटारसायकल आडवी घातली. चाकूचा धाक दाखवत त्याला मोटारसायकलवर बसवले. त्यानंतर पुणे राष्ट्रीय महामार्गावरील विजापूर बायपासजवळ नेले. तेथे त्याच्या मोबाइलमधील फोन पेवरून २० हजार रुपये घेतले. त्यानंतर त्याच्याच मोबाइलवरून बाहेती यांना फोन केला अन् ५० लाखांची मागणी केली. पैसे मिळत नसल्याचे लक्षात आल्यानंतर दोन तासांनी सर्वेशला सोडून दिले. याप्रकरणी फौजदार चावडी पोलीस ठाण्यात गुन्हा दाखल झाला होता.

गुन्हा दाखल होताच गुन्हे शाखेच्या पथकामार्फत शोध घेतला जात होता. गुन्हे शाखेच्या पोलिसांना खबऱ्याने माहिती दिली. अपहरण आणि खंडणीमधील दोघे संशयित थांबले आहेत. गुन्हे शाखेच्या पोलिसांनी जुना पुना नाका परिसरातच दोघांना पकडले. अधिक माहिती घेतली असता हा कट बाहेती यांच्या मेडिकल दुकानातील कामगार प्रणव ठाकूरदास याच्या सांगण्यावरून केल्याचे समजले. पोलिसांनी या सर्व प्रकरणात दोन मोटारसायकली, चार मोबाइल असा एक लाख ७८ हजार ५०० रुपयांचा मुद्देमाल जप्त केला.