दिवाळीत शिर्डी मतदारसंघात विखे पाटील कुटुंबांयाच्या वतीने घरोघरी साखर वाटप करण्यात आले होते. यावरून दक्षिण भागातून आरोप झाले होते. डॉ. विखे पाटील यांचा लोकसभा मतदारसंघ दक्षिण भागात असताना फक्त शिर्डीतच साखर वाटप का? असा सवाल करण्यात येत होता. त्यावरून विखे पाटील यांनी आपली साखर काही राजकारण्यांना कडू लागल्याचा आरोपही केला होता.

त्याचवेळी दक्षिण भागात लवकरत साखर वाटपाची घोषणा केली होती. त्यानुसार नगर दक्षिण लोकसभा मतदारसंघात सध्या प्रत्येक कुटुंबाला प्रत्येकी पाच किलो साखर वाटप सुरु करण्यात आले आहे. त्यासाठी गावातील रेशन कार्ड धारकांची माहिती घेतली जाते. त्यांच्या झेरॉक्स घेऊन रांगेत वाटप केले जाते. मात्र, या साखर वाटपातील गोंधळावरून गावागावात वाद निर्माण होताना दिसत आहेत.

शेवगाव तालुक्यातील बोधेगाव येथील असाच एक व्हिडिओ व्हायरल झाला आहे. तेथे अनेकांना दिवसभर थांबूनही साखर मिळाली नाही. त्यामुळे महिलांनी तीव्र शब्दात नाराजी व्यक्त केल्याचे दिसते. साखर द्यायचीच नव्हती तर रेशनकार्डच्या झेरॉक्स घेवून उन्हात उभे का केले, असा सवाल महिला करीत असल्याचे व्हिडिओत दिसत आहे.

भाजपच्या आमदार मोनिका राजळे व खासदार डॉ. सुजय विखे पाटील यांच्यावतीने शेवगाव तालुक्यात साखर वाटपाचा कार्यक्रम झाला. अनेक ठिकाणी तो सुरळीत पार पडला असला तरी बोधेगावच्या घटनेने त्याला गालबोट लागले आहे.

श्रीराम मंदिरांच्या उद्घाटनाच्या पार्श्वभूमीवर आपल्या मतदारसंघात जानेवारीत दुसरी दिवाळी साजरी करण्यात येणार आहे. नागरिकांनी ही साखर व दाळ यांच्यापासून लाडू तयार करून श्रीरामाला नैवेद्या दाखवावा, असे आवाहन डॉ. विखे पाटील यांनी साखर वाटपाच्या कार्यक्रमात केले. टप्प्या टप्प्याने मतदारसंघातील सर्व तालुक्यांत हे वाटप होणार आहे.