श्रींचा शाही विवाह सोहळ्यानिमित्त येथील श्रीच्या मंदिरात आज पहाटेपासून भाविकांची दर्शन रांग लागली होती. ही रांग दर्शनबारी पूर्णत: भरुन मंदिराच्या उत्तर दिशेच्या प्रवेशद्वाराच्या रस्त्यावर भाविक रांगेत उभे होते. यात्रेस आलेल्या भाविकांमुळे मंडीर परिसरासह शहरातील सर्व रस्ते भाविकांच्या गर्दीने फुलून गेले होते. यंदा माण तालुक्यात दुष्काळाचे सावट असल्यामुळे पावसाअभावी माण नदीचे पात्र कोरडे राहिले. यामुळे प्रशस्त कोरड्या पात्रात भाविकांच्या मुक्कामाची सुविधा झाली. याबरोबरच यंदा नदीपात्रातूनच रथ मिरवणुक काढण्यात आली. माण नदीपात्रात दुपारी तीन वाजता रथ मिरवणुकीने प्रवेश करताच नदी पात्रात काल रात्री गावोगावच्या मुक्कामी राहिलेल्या मानाच्या काठ्या व सासने वाजंत्रीसमवेत संबंधित भाविकांनी श्रीच्या रथास भेट दिल्या.

आज दुपारी दीडच्या सुमारास येथील राजवाड्यातून रथाचे मानकरी समवेत मिरवणुकीने श्रीच्या मंदिरराकडे मार्गस्थ झाले. रथ मिरवणुकीच्या सोहळ्यानिमित्त मंदिराचे सालकरी गणेश गुरव यांच्या निवासस्थानी स्थापन्न करण्यात आलेल्या श्री सिध्दनाथ व देवी जोगेश्वरीच्या उत्सवमूर्तीची प्रथम पूजा व नंतर आरती करण्यात आली. यावेळी रथाचे मानकरी राजेमाने कुटुंबातील सर्व सदस्य, माण, खटावच्या उपविभागीय अधिकारी उज्वला गाडेकर माणचे तहसीलदार विकास अहिरे, पोलिस उपअधीक्षक अश्विनी शेंडगे, म्हसवड पोलिस ठाण्याचे सहायक पोलिस निरीक्षक राजकुमार भुजबळ, पालिकेचे प्रशासक तथा मुख्याधिकारी डॉ. सचिन माने, माजी नगराध्यक्ष विलासराव माने, माजी नगरसेवक युवराज सूर्यवंशी, मंदिराचे मानकरी मोहनराव डुबल, शिदोजीराव डुबल, मंदीर ट्रस्टीचे अध्यक्ष गणेश गुरव, सचिव दिलीप किर्तने, आजी-माजी नगरसेवक व याबरोबरच मंदिराचे गुरव पुजारी, रथ ओढणारे माळी समाजाचे मानकरी उपस्थित होते.

श्रीची आरती होताच श्रींच्या मूर्ती पालखीत स्थानापन्न करण्यात आल्या. त्यानंतर गुलाल- खोबऱ्याची उधळण करीत ही पालखी मिरवणूक श्रीच्या मंदिरातूव रिंगावन पेठेतील यात्रा मैदानात मिरवणुकीस सज्ज ठेवलेल्या रथानजिक पोहचली. भाविकांनी नवसपुर्तीसाठी रथास अर्पण केलेल्या असंख्य निशाणांनी सजविलेल्या रथामधील सिंहासनावर मंदिराचे सालकरी समवेत श्रीच्या उत्सवमूर्ती विराजमान करताच दुपारी दोनच्या सुमारास “श्री सिध्दनाथाच्या नावानं चांगभलं” च्या जयघोषात मोलाच्या निनादात रथावर गुलाल- खोबऱ्याची उधळण करीत उपस्थित भाविकांनी चारचाकी लाकडी रथास जोडलेल्या दोन जाड दोरखंडाच्या साह्याने रथ ओढीत मिरवणुकीस नगर प्रदक्षिणा मिरवणुकीस मार्गस्थ केला. यावेळी गुलाल उधळणीमुळे संपूर्ण यात्रा परिसर गुलालमय झाला. चालत्या रथावर नवसाची नारळाची तोरणे, रंगबिरंगी निशाणे, रथावर अर्पण करण्यासाठी भाविकांची मोठी गर्दी झाली.

दुपारी दोन वाजता सुरु झालेली ही रथ मिरवणूक माण नदी पात्रातून सातारा- म्हसवड- लातूर या केंद्रीय महामार्गावरुन बसस्थानकानजिकहून येथील प्राथमिक आरोग्य केंद्रे लगतच्या वडजाई ओढ्यातील पात्रात विश्रांतीसाठी थांबविण्यात येते व याच ठिकाणी पारंपारिक रितीने श्रीच्या रथावरुन श्रीला नवस केल्यानंतर जन्मलेल्या मुलांना नवस पूर्तीसाठी श्रीच्या रथावरून उधळण्याचा कार्यक्रम संपताच ही मिरवणूक वडजाई ओढ्याच्या पात्रालगतच्या रसत्यावरून पूर्ववत रिंगावन पेठ मैदानात मध्यरात्रीनंतर विसर्जित केली जाते. या रथावरील श्रीच्या मूर्ती श्रीचे सालकरी मंदिरात घेऊन जातात.

याबरोबरच सलग नऊ वर्षाच्या कालखंडानंतर काळ्या कापडाच्या तंबूतील टुरींग टॉकीज सिनेमा थिएटर यंदाच्या यात्रेत आल्यामुळे दिवसरात्र या तंबूतील चित्रपट पाहण्याची संधी भाविकांनी गमावली नाही.