वाशिम जिल्ह्यातील कारंजा लाडजवळील माहेर असलेल्या गावातून शिल्पा यांनी आपले बीकॉम पर्यंतचे शिक्षण पूर्ण केले. मात्र, नोकरीच्या शोधासाठी विविध स्पर्धापरीक्षा द्याव्या लागतात. त्यासाठी महागडी पुस्तके खरेदी करावी लागतात. मात्र पतीची कमाई जेमतेम असल्याने परीक्षा फीस भरणे किंवा पुस्तके खरेदीसाठी अतिरीक्त खर्च परवडत नसल्याने, मोबाइलवरच आपले ज्ञान वृद्धिंगत करण्यासाठी प्रयत्न करीत असल्याचे शिल्पा यांनी सांगितले.

शिल्पा यांनी ‘कौन बनेगा करोडपती’ प्रवेशासाठी विचारलेल्या प्रश्नांची सर्वात जलद उत्तरे देत स्थान निश्चित केले. स्वप्नवत सर्व घडत असताना बिनधास्तपणे महानायक अमिताभ बच्चन यांच्या प्रश्नांची उत्तरे दिली. महानायक अमिताभ बच्चनशी बोलताना शिल्पा मेश्राम यांचा आत्मविश्वास दांडगा होता. शिल्पा यांना त्यांचा छंद पूर्ण करण्यासाठी पती प्रशांत मेश्राम यांचे पूर्ण पाठबळ मिळत असल्याचे शिल्पा यांनी सांगितले.