सोमवारी रात्री दहा वाजण्याच्या सुमारास चर्चगेट किंवा सीएसएमटीहून गोरेगाव रेल्वे स्थानकात उतरलेल्या प्रवाशांची बोरिवली, विरारच्या दिशेने प्रवास करण्यासाठी फलाट क्रमांक ५वर गर्दी उसळली होती. परंतु, रात्री १० ते साधारण ११.३० या दीड तासांत चर्चगेटहून येणाऱ्या फक्त तीन बोरिवली लोकल आणि एक विरार लोकल गोरेगाव स्थानकातून गेल्या. त्या इतक्या खच्चून भरल्या होत्या की, गोरेगावला प्रवाशांना आत शिरताच येत नव्हते. लोकल किंवा फलाटांवर उद्घोषणा होत नसल्याने हालांत भर पडली.

स्थानकाबाहेर बसची प्रतीक्षा

स्थानकात हा गोंधळ सुरू असताना बाहेर मिरा रोड-भाईंदरचे प्रवासी रिक्षाचे भाडे शेअर करण्यासाठी एकमेकांना विचारणा करताना दिसत होते. कांदिवली-बोरिवलीच्या काही प्रवाशांनी अखेर बस किंवा रिक्षाने प्रवास करीत कसेबसे घर गाठले.

महिलांचे हाल

लोकलच्या डिस्प्ले बोर्डवरील माहितीमुळे लोकल खरोखरच किती वेळात येणार, किती डब्यांची आहे, हे समजत नव्हते. त्यामुळे फलाटावर अर्ध्या तासाची प्रतीक्षा केल्यानंतरही, लोकल थांबल्यावर महिलांच्या डब्यापर्यंत पोहोचण्यासाठी पळापळ होत होती. यात एक लोकल सुटल्यावर, पुढे अर्धा तास प्रतीक्षा करण्याशिवाय पर्याय नव्हता. रात्री ११ वाजल्यानंतर महिला डबे ‘जनरल’ डब्यात रूपांतरित झाले आणि आधीच तुडुंब गर्दीत पुरुष चढत असल्याने अनेक महिलांना अडचणींना सामोरे जावे लागले.

Read Latest Maharashtra News And Marathi News