नागपूर : मराठा आरक्षणाबाबत उद्धव ठाकरे यांनी केंद्रीय मंत्र्यांचे राजीनामे मागितले आहेत. भारतीय जनता पक्षाचे (भाजप) प्रदेशाध्यक्ष चंद्रशेखर बावनकुळे यांनी उध्दव ठाकरे यांच्या वक्तव्यावर जोरदार प्रहार केला आहे. मंगळवारी नागपूर विमानतळावर पत्रकारांशी बोलताना बावनकुळे म्हणाले, “उद्धव ठाकरेंच्या चुकांचे परिणाम राज्याला भोगावे लागत आहे. या सगळ्याला ते जबाबदार आहेत, त्यामुळे त्यांनी माफी मागावी.” उद्धव ठाकरेंच्या चुकांमुळे महाराष्ट्र हे पाहत आहे. त्यांच्या चुकांमुळे ही परिस्थिती उद्भवली असून त्याचे परिणाम राज्य भोगत आहे. जे आंदोलन होत आहे त्याला उद्धव ठाकरे जबाबदार आहेत. त्यामुळे त्यांना बोलण्याचा अधिकार नाही. त्यांनी राज्याची माफी मागावी.” असे बावनकुळे म्हणाले.
तेच आरक्षणाचे खरे मारेकरी: एकनाथ शिंदे
भाजप पक्ष मुख्यमंत्री एकनाथ शिंदे यांच्यासोबत
सर्वोच्च न्यायालयाने कोणत्या मुद्द्यांमुळे आरक्षण रद्द केले, यावर बोलताना बावनकुळे म्हणाले, “त्यावेळी सर्वोच्च न्यायालयात सुधारणा करता आली असती, पण उद्धव ठाकरे सरकारने तसे केले नाही. मुख्यमंत्री एकनाथ शिंदे सातत्याने प्रयत्न करत आहेत. बावनकुळे पुढे म्हणाले की,मराठा आरक्षणाबाबत काल भारतीय जनता पक्षाच्या कोअर कमिटीची बैठक पार पडली, त्यात महाराष्ट्राचे मुख्यमंत्री एकनाथ शिंदे चर्चा करतील, असे ठरले आहे. मराठा आरक्षणासाठी, जो काही निर्णय होईल, त्याला भारतीय जनता पक्षाचा पाठिंबा असेल, जे ही करायचं आहे ते सरकार करेल , भारतीय जनता पक्ष पक्षम्हणुन त्यांचा मागे उभा आहे. यासाठी विशेष अधिवेशन बोलवायचे असेल तर अधिवेशन बोलवा. मुख्यमंत्री जो काही निर्णय घेतील ,त्यामागे भारतीय जनता पक्ष उभा आहे, असे बावनकुळे यांनी म्हटले.
तेच आरक्षणाचे खरे मारेकरी: एकनाथ शिंदे
मराठा आरक्षणाचे खरे मारेकरी उद्धव ठाकरेच असल्याचे सांगत, मुख्यमंत्री एकनाथ शिंदे यांनी माजी मुख्यमंत्री उद्धव ठाकरे यांना मंगळवारी प्रत्युत्तर दिले. मराठा समाजाबद्दल त्यांना किती संवेदना आहेत, हे त्यांनाही आणि मराठा समाजालाही माहीत आहे. सर्वोच्च न्यायालयात मराठा आरक्षण न टिकण्यासाठी ठाकरेच जबाबदार असल्याचा आरोपही मुख्यमंत्री शिंदे यांनी केला.
शिवसेना ठाकरे गटाचे प्रमुख उद्धव ठाकरे यांनी मराठा आरक्षणावरून राज्य सरकारला लक्ष्य केले. त्यांच्या टीकेला मुख्यमंत्री शिंदे यांनी वरील शब्दांत उत्तर दिले. ‘मराठी बाण्यावर बोलणाऱ्यांना मराठा आरक्षणावर बोलण्याचा त्यांना नैतिक अधिकार नाही. देवेंद्र फडणवीस मुख्यमंत्री होते त्याकाळात मराठा समाजाला आरक्षण दिले आणि न्यायालयात ते टिकवण्याचे कामही फडणवीस आणि आम्ही केले. सर्वोच्च न्यायालयात प्रकरण गेल्यानंतर त्यावेळेस मुख्यमंत्री कोण होते? उपसमितीचे अध्यक्ष कोण होते? त्यांनी हे आरक्षण टिकवले नाही. खरेतर मराठा समाजाच्या आरक्षणाचे मारेकरी खऱ्या अर्थाने तुम्ही आहात. तुम्ही मराठा समाजाच्या महिलांच्या मूक मोर्चाला मुका मोर्चा म्हणून हिणवले. माता-भगिनींचा अपमान करणारे कोण होते, हे देखील सखल मराठा समाजाला माहिती आहे,’ असेही मुख्यमंत्री म्हणाले.
‘मराठा समाजाचे आरक्षण घालवायला तुम्ही जबाबदार आहात. आम्ही ते आरक्षण मिळवण्याचा प्रयत्न करतोय. त्यासाठी क्युरेटिव्ह पिटीशन दाखल केली आहे. त्यामुळे आम्ही प्रामाणिकपणे आमचे सरकार मराठा समाजाला आरक्षण देण्यासाठी कटिबद्ध आहे. या सर्वाला कारणीभूत असणाऱ्यांना मराठा आरक्षणावर बोलण्याचा अधिकार उरलेला नाही,’ अशी टीकाही शिंदे यांनी केली.
‘मराठा आरक्षण उच्च न्यायालयात टिकले तेव्हा किती लक्ष दिले? तुम्ही किती पुरावे दिले? मराठा समाज हा पुढारलेला आहे, मागास नाही हे न्यायालयाने म्हटले त्यावेळी मराठा समाज मागास कसा आहे याचे सर्व पुरावे तुम्ही न्यायालयात द्यायला हवे होते. तुम्ही तिथे कमी पडलात. अपयशी झालात. तुम्ही मुद्दाम ते केले. या सर्व गोष्टी मराठा समाजाला माहिती आहेत,’ असेही मुख्यमंत्री म्हणाले.
‘मराठा समाज शिस्तप्रिय आहे. मराठा समाज शांततेने आंदोलन करणारा आहे. मराठा समाजाला टिकणारे, कायद्याच्या चौकटीत बसणारे आरक्षण देण्याची जबाबदारी आमची आहे. आम्ही त्यासाठी कटिबद्ध आहोत. आमचे काम युद्ध पातळीवर सुरू आहे. त्यामुळे त्यांच्या पायाखालची जमीन सरकली आहे. आम्ही करू शकलो नाही, पण हे करण्याचे प्रयत्न करत आहेत, असे त्यांना वाटतेय,’ असा दावाही मुख्यमंत्र्यांनी केला.
आज सर्वपक्षीय बैठक
मराठा आरक्षणाच्या मागणीसाठी राज्यात सुरू असलेल्या आंदोलनाला हिंसक वळण लागले आहे. आंदोलनाचे लोण राज्यभर पसरण्याची भीती आहे. या पार्श्वभूमीवर राज्य सरकारने बुधवारी सर्वपक्षीय बैठक आयोजित केली आहे. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या उपस्थितीत सह्याद्री या शासकीय अतिथीगृहात सकाळी साडेदहा वाजता ही बैठक होईल.
ठाण्यात मुख्यमंत्र्यांच्या निवासस्थानी सुरक्षावाढ
मराठा आरक्षणाच्या मागणीप्रश्नी राज्यात विविध भागांत आंदोलनाला हिंसक वळण लागले असताना ठाण्यातील मुख्यमंत्री एकनाथ शिंदे यांच्या खासगी निवासस्थानाच्या सुरक्षेत मोठ्या प्रमाणात वाढ करण्यात आली आहे. अतिरिक्त ५० पोलिस अधिकारी-कर्मचाऱ्यांची कुमक, एसआरपीएफ तुकडीही याठिकाणी तैनात करण्यात आली आहे. अनुचित प्रकार टाळण्यासाठी मंगळवार सकाळपासूनच बंदोबस्तात ही वाढ करण्यात आली आहे.मराठा आरक्षणासाठी सुरू असलेल्या आंदोलनात राज्याच्या विविध भागांत काही आमदारांच्या घरात, कार्यालयावर दगडफेक आणि काही ठिकाणी जाळपोळ करण्यात आली. या परिस्थितीच्या अनुषंगाने मुख्यमंत्री शिंदे यांच्या ठाण्यातील लुईसवाडी येथील ‘शुभदीप’ या खासगी निवासस्थानाबाहेर पोलिसांचा फौजफाटा वाढवण्यात आला. मुख्यमंत्र्यांच्या निवासस्थानसमोरील रस्त्यावरही पोलिस कडक पहारा देत असून, एसआरपीएफची अतिरिक्त तुकडीही तैनात करण्यात आली आहे.
खा. श्रीकांत शिंदे यांच्या घराबाहेरही पोलिस बंदोबस्त
डोंबिवली : राज्यभरात मराठा आंदोलनाला हिंसक वळण लागले असून, अनेक जिल्ह्यांमध्ये लोकप्रतिनिधी, राजकीय नेत्यांची घरे, कार्यालये जाळण्यात आली आहेत. त्यामुळे राजकीय कार्यालयाबाहेर पोलिसांचा चोख बंदोबस्त ठेवण्यात आला आहे. डोंबिवलीतील एमआयडीसी परिसरातील खासदार श्रीकांत शिंदे यांच्या बंगल्याबाहेरही पोलिसांचा फौजफाटा तैनात करण्यात आला आहे.