म. टा. खास प्रतिनिधी, मुंबई : जोगेश्वरी-विक्रोळी लिंक रस्त्यावरील वाहतूककोंडीपासून मुक्तता मिळण्यासाठी मेट्रो मार्गिकेच्या निमित्ताने अंधेरी पश्चिम ते पूनमनगरदरम्यान डबल डेकर उड्डाणपूल उभा केला जाणार आहे. यापैकी काही भागातील उड्डाणपूल महापालिकेने याआधीच उभा केला आहे. मात्र या संपूर्ण पट्ट्यातील उड्डाणपुलाची उभारणी आता मुंबई महानगर प्रदेश विकास प्राधिकरण (एमएमआरडीए) करणार आहे. त्यासाठीच्या ३७८ कोटी रुपयांच्या खर्चाला प्राधिकरणाचे मंजुरी दिली आहे.
जोगेश्वरी ते विक्रोळी यांना जोडण्यासाठी ‘मेट्रो ६’ ही उन्नत मेट्रो मार्गिका उभी होत आहे. जोगेश्वरी पश्चिमेकडील स्वामी समर्थनगर ते विक्रोळीच्या पूर्व द्रुतगती मार्गादरम्यान ही मार्गिका असेल. मार्गिकेची उभारणी ७० टक्के पूर्ण झाली असताना त्यादरम्यान उड्डाणपूल उभा करण्याचे नियोजनदेखील करण्यात आले आहे. त्यातील उड्डाणपुलाचा काही भाग महापालिकेने आधीच उभा केला असल्याने आता उर्वरित एकूण १.५७ किमी लांबीच्या उड्डाणपुलाची उभारणी एमएमआरडीए करणार आहे. यासाठीच्या खर्चाला प्राधिकरणाच्या कार्यकारी समितीने २७६ व्या बैठकीत अलीकडेच मंजुरी दिली.
जोगेश्वरी ते विक्रोळी यांना जोडण्यासाठी ‘मेट्रो ६’ ही उन्नत मेट्रो मार्गिका उभी होत आहे. जोगेश्वरी पश्चिमेकडील स्वामी समर्थनगर ते विक्रोळीच्या पूर्व द्रुतगती मार्गादरम्यान ही मार्गिका असेल. मार्गिकेची उभारणी ७० टक्के पूर्ण झाली असताना त्यादरम्यान उड्डाणपूल उभा करण्याचे नियोजनदेखील करण्यात आले आहे. त्यातील उड्डाणपुलाचा काही भाग महापालिकेने आधीच उभा केला असल्याने आता उर्वरित एकूण १.५७ किमी लांबीच्या उड्डाणपुलाची उभारणी एमएमआरडीए करणार आहे. यासाठीच्या खर्चाला प्राधिकरणाच्या कार्यकारी समितीने २७६ व्या बैठकीत अलीकडेच मंजुरी दिली.
एमएमआरडीएनुसार, महापालिकेने न्यू लिंक रोड ते पूनमनगर, महाकालीदरम्यान उड्डाणपुलाचे नियोजन केले होते. त्यापैकी एसव्ही रोड ते लक्ष्मीनगर, जोगेश्वरी पूर्व हा उड्डाणपूल बांधून पूर्ण झाला असून २०१५ पासून वाहतुकीसाठी सुरू आहे. मात्र त्यानंतर हा उड्डाणपूल पूर्ण करण्याची जबाबदारी महापालिकेने प्राधिकरणाकडे सोपवली. या प्रकल्पासाठी लागणाऱ्या एकूण ७६८.८६ कोटी रुपये खर्चापैकी ३८४.५० कोटी रुपये रक्कम महापालिकेने प्राधिकरणाकडे दिली आहे. त्याचवेळी ‘मेट्रो ६’ची उभारणी दिल्ली मेट्रो रेल कॉर्पोरेशनच्या सहकार्याने एमएमआरडीए करीत असल्याने या उड्डाणपुलाचा काही भाग त्यांनी उभा करण्यास सुरुवात केली आहे. मात्र त्याखेरीज उड्डाणपुलाचा उर्वरित भाग हा ‘मेट्रो ६’च्या खांबांवरच उभा होणार आहे. या माध्यमातू इन्फिनिटी मॉल (न्यू लिंक रोड) ते पूनमनगरदरम्यान १.५७ किमी लांबीचा ‘डबल डेकर’ पद्धतीचा उड्डाणपूल आता उभारण्यात येणार आहे. त्याअंतर्गत वाहनांसाठीचा उड्डाणपूल व त्याच्या डोक्यावर मेट्रो, अशी रचना असेल.
१.७४ कोटींची सवलत
या बांधकामासाठीच्या निविदेत जे. कुमार इन्फ्रा यांची ३८०.४४ कोटी रुपयांची बोली सर्वात कमी ठरली. मात्र प्राधिकरणाने त्यांच्याकडे सवलत मागितली. त्यानुसार कंपनीने १ कोटी ७४ लाख २१ हजार ३५३ रुपयांची सवलत दिली. त्यानंतर आता ३७८ कोटी ७० लाख ३८ हजार ३५० रुपये खर्चून हा उड्डाणपूल उभा होणार आहे.
असा असेल उड्डाणपूल
इन्फिनिटी मॉल (न्यू लिंक रोड), मिल्लत शाळा, वीरा देसाई रोड, पश्चिम द्रुतगती मार्ग ते पूनमविहार. यादरम्यान लक्ष्मीनगर येथे महापालिकेच्या उड्डाणपुलाला जोडण्यासाठी स्वतंत्र रॅम्पदेखील असेल.
राज्यात वीजमागणीचा उच्चांक, एकाच दिवसात २५ हजार मेगावॉट विजेचा वापर, तापमान वाढीचा परिणाम