तरुणांची दुनिया काही औरच असते. त्यांना त्यांच्या विश्वात रमायला आणि त्यांच्या मनाप्रमाणे जगायला आवडते. अशात एक नवा ट्रेण्ड तरुणांमध्ये बघायला मिळत आहे. शहरात स्वत:चे घर असतानाही तरुण घर किंवा खोली भाड्याने घेत आहेत. शहराच्या सीमेलगत, विशेषत: इंजिनीअरिंग आणि मेडिकल कॉलेज असणाऱ्या परिसरांमध्ये हा प्रकार बघायला मिळत आहे. भाड्याने खोली वा घर घेतल्यावर ‘नाइटआउट’, ‘वीकेंड’मध्ये वेळ घालविण्यासाठी याचा वापर होत आहे.
यामागील कारणे काय?
-वीस ते तीस वयोगटातील तरुण शिक्षणासोबतच पार्टटाइम किंवा फुलटाइम कामदेखील करतात. अतिशय व्यस्त कार्यशैलीमुळे त्यांना त्यांच्या मित्रांबरोबर किंवा जोडीदाराबरोबर वेळ घालवायची पुरेशी संधी मिळत नाही.
-कॅफेमध्ये सातत्याने भेटणे किंवा हॉटेलमध्ये काही वेळेपुरते खोली भाड्याने घेणे अतिशय महागडे प्रकरण ठरते. सुरक्षेच्या दृष्टीनेही हे धोकादायक ठरू शकते.
-सोशल मीडियाच्या वाढत्या वापरामुळे सार्वजनिक ठिकाणी प्रायव्हसी भंग होण्याची शक्यता असते. मॉरल पोलिसिंगमुळे सार्वजनिक ठिकाणी भेटणे टाळले जाते.
-घरातील पालक कडक असल्यानेदेखील अनेक मुले-मुली खासगी वेळ मिळावा, यासाठी हा मार्ग अवलंबितात.
मित्रांची घेतली जाते मदत
साधारणत: फ्लॅटचे दर महागडे असल्याने तीन-चार मित्र किंवा मैत्रिणींच्या समूहामध्ये भाड्याने घर घेतले जाते. यामधील एक-दोन मित्र बाहेरच्या गावातील बघितले जातात. जेणेकरून ते त्या ठिकाणी पूर्ण वेळ राहू शकतात. उर्वरित मित्र आठवड्यातून कधी-कधी किंवा जेव्हा प्रायव्हसीची गरज असेल तेव्हा फ्लॅटवर येतात आणि वेळ घालवतात. सहा ते दहा हजार रुपये दरामध्ये २-३ बीएचके फ्लॅट भाड्याने मिळतो. शेअरिंग पद्धतीने एका व्यक्तीला केवळ दोन-तीन हजारात संपूर्ण महिनाभरासाठी हक्काची जागा उपलब्ध राहते. शहराच्या सीमालगतच्या भागात अशा स्वरूपात भाड्याने राहणाऱ्यांची संख्या वाढली आहे.