एएसआय मीना यांच्यासोबत असलेल्या चेतन सिंग याची तब्येत ठीक नसल्याचा संदेश वलसाड नियंत्रण कक्षाला देण्यात आला. वलसाडमध्ये पर्यायी कर्मचारी देण्याची तयारी आरपीएफने केली. मात्र, ‘मी तंदुरुस्त असून ड्युटी करण्यास तयार आहे’, असे शिपाई चेतनने सांगितले. त्यानंतर गाडी रवाना करण्यात आली. पालघर-विरार दरम्यान गाडी पोहोचल्यानंतर चेतनने त्याच्याकडील एके ४७ रायफलमधून तीन डब्यांमध्ये गोळीबार केला. यात एएसआय मीना यांच्यासह अजगर अब्बास शेख, अब्दुल कादरभाई मोहम्मद हुसेन भानपूरवाला या प्रवाशांचा मृत्यू झाला. तिसऱ्या मृत प्रवाशाची ओळख पटवण्याचे काम सुरू आहे, असे रेल्वे पोलिसांनी सांगितले.

मृतदेह खाली पडले होते, तो पोलीस रिव्हॉल्व्हर घेऊन बोगीत फिरत होता; जयपूर-मुंबई एक्सप्रेसमध्ये नेमकं काय घडलं?

मिरारोड ते दहिसर दरम्यान गाडीतील एस-५ डब्यातील आपत्कालीन साखळी ओढून चेतनने गाडी थांबवली. यावेळी त्याने पुन्हा गोळीबार करत रायफल तिथेच टाकली आणि पळण्याचा प्रयत्न केला. मात्र रेल्वे पोलिस व रेल्वे सुरक्षा दलाच्या कर्मचाऱ्यांनी चेतनला पकडले, असे प्रत्यक्षदर्शींनी सांगितल्याचे रेल्वे प्रशासनाने स्पष्ट केले. शवविच्छेदनानंतर मृतदेह कुटुंबीयांच्या ताब्यात देण्यात आल्याचे रेल्वे पोलिसांनी सांगितले.

झोपेचा त्रास, भांडखोर, शीघ्रकोपी

मूळचा हाथरस (उत्तर प्रदेश) येथील असलेल्या ३० वर्षीय चेतन सिंगची वडिलांच्या जागेवर अनुकंपा तत्त्वावर आरपीएफमध्ये नियुक्ती करण्यात आली होती. भावनगरमध्ये असताना त्याने मुंबईत बदली करण्याची मागणी केली. त्यानुसार मार्च २०२३मध्ये त्याची मुंबईला बदली करण्यात आली. यापूर्वी तो भावनगर आणि उज्जैनमध्ये नियुक्तीवर होता. उज्जैनमध्ये असताना त्याने अनेकदा आरपीएफ सहकाऱ्यांसोबत भांडणे केली होती. त्याला झोपेचा त्रास असून त्याचा स्वभाव भांडखोर आणि शीघ्रकोपी असल्याचे प्राथमिक चौकशीत समोर आले आहे. त्यादृष्टीने तपास सुरू आहे, असे पोलिसांनी सांगितले.

सगळं ठरलं होतं, ६ महिन्यांनंतर…; गोळीबारात जीव गमावलेल्या ASIचे वडील धाय मोकलून रडले

१२ गोळ्या, तीन डबे आणि चार मृत्यू

बोरिवली स्थानकात गाडीतील बी-५ डब्यामधून दोन, एस-६ मधील एक आणि खानपान डब्यालगत एक असे चार मृतदेह ताब्यात घेण्यात आले. आरोपी चेतनने एकूण १२ गोळ्या झाडल्या, असे रेल्वे पोलिसांनी स्पष्ट केले.

एक्स्प्रेसमधील शस्त्रधारी सुरक्षा पथक

– टिकाराम मीना, सहायक उपनिरीक्षक (एक पिस्तुल – १० गोळ्या )

– हवालदार नरेंद्र परमार (एक पिस्तुल आणि १० गोळ्या)

– शिपाई अमेय (एके ४७ आणि २० गोळ्या)

– शिपाई चेतन सिंग (एके ४७ आणि २० गोळ्या)

धोरणावर पुन्हा विचार व्हावा

प्रवाशांवर झालेल्या अंदाधुंद गोळीबारामुळे सुरक्षा यंत्रणांच्या शिपायांना देण्यात येणाऱ्या ‘एके ४७’ शस्त्रावर पुन्हा एकदा केंद्रीय स्तरावर विचार करण्याची गरज निर्माण झाली आहे, असे मत सुरक्षा यंत्रणेतील अतिवरिष्ठ अधिकाऱ्यांकडून व्यक्त होत आहे.