मुंबई: ज्या शरद पवारांच्या विचारांवर आणि धोरणांवर राष्ट्रवादी काँग्रेस पक्षाने २५ वर्ष वाटचाल केली आता त्याच पक्षात दोन सत्ताकेंद्र निर्माण झाली आहेत. जो पक्ष शरद पवारांच्या धाकावर चालायचा आता त्याच राष्ट्रवादीतील एका गटाने शरद पवारांचा शब्द ओलांडून वेगळी चूल मांडली. अजित दादांनी घेतलेल्या भाजपसोबत जाण्याच्या निर्णयामुळे पिढ्यानपिढ्या शरद पवार या नावाशी जोडले गेलले नेते पवारांपासून दुरावले. अजित दादांचे हात बळकट करणाऱ्या आमदारांचीही संख्या वाढतच चाललीय पण राष्ट्रवादीतील अशा काही महिला नेत्या आहेत ज्या पवारांमागे आपल्या ताकतीनिशी उभ्या आहेत.
राज्य महिला आयोगाच्या अध्यक्ष रूपाली चाकणकर वगळता पक्षातील कुठलीही मोठी महिला नेता अजित दादांच्या गटात सामील झालेली नाही. विरोधकांवर तोफ डागणाऱ्या, संघटनात्मक पातळीवर आणि संसदेत कार्यरत असणाऱ्या इतर महिला नेत्या शरद पवारांसोबत ठाम उभ्या राहिल्या आहेत. त्यातलं पहिलं नाव म्हणजे फौजिया खान
राज्य महिला आयोगाच्या अध्यक्ष रूपाली चाकणकर वगळता पक्षातील कुठलीही मोठी महिला नेता अजित दादांच्या गटात सामील झालेली नाही. विरोधकांवर तोफ डागणाऱ्या, संघटनात्मक पातळीवर आणि संसदेत कार्यरत असणाऱ्या इतर महिला नेत्या शरद पवारांसोबत ठाम उभ्या राहिल्या आहेत. त्यातलं पहिलं नाव म्हणजे फौजिया खान
फौजिया खान:
शरद पवारांनी आघाडी सरकारच्या काळात दोनवेळा खान यांना विधानपरिषदेची संधी दिली. तसेच, दोन वेळा त्यांची मंत्रीपदी वर्णीही लागली होती. यासोबतच
२०१८ मध्ये राष्ट्रवादी महिला काँग्रेसच्या अध्यक्षपदी त्यांची नियुक्ती करण्यात आली. यानंतर पुन्हा २०२० मध्ये खान यांची राज्यसभेवर निवड करण्यात आली.
फौजिया खान यांचा निवडणुकीच्या राजकारणातील वावर मर्यादित असला तरी प्रतिकात्मक राजकारणासाठी शरद पवारांनी त्यांना योग्य ती संधी दिली. नव्याने संघटनात्मक बांधणी करत असताना पवारांसाठी फौजिया खान नक्कीच फायदेशीर ठरू शकतात.
वंदना चव्हाण:
वंदना चव्हाण यांनी १९९७ -९८ काळात पुण्याच्या महापौर म्हणून काम पाहिलं. काँग्रेस आणि राष्ट्रवादी काँग्रेस पक्षाचं आघाडी सरकार सत्तेत आल्यावर
शरद पवारांनी त्यांना विधानपरिषदेवर पाठवलं. तसेच वंदना चव्हाण यांच्यावर पुणे राष्ट्रवादी शहराध्यक्षपदाची जबाबदारी सोपवली. २०१२ आणि २०१८ अशी दोन वेळा चव्हाण यांना पवारांनी राज्यसभेवर पाठवत प्रतिनिधीत्व करण्याची संधी दिली.
२०१२ आणि २०१७ च्या पुणे महानगरपालिका निवडणुकीत त्यांनी महत्त्वाची भूमिका बजावली . पुण्यात अजितदादा समर्थकांचा गट आपली ताकत वाढवत असताना वंदना चव्हाणांनी नेहमीच पवारांची साथ निभावली.
विद्या चव्हाण:
२०११ ला पहिल्यांदा विधानपरिषदेवर निवडून गेल्या. लगेच दुसऱ्या टर्ममध्ये म्हणजेच २०१४ साली दुसऱ्यांदा चव्हाण यांना विधानपरिषदेची संधी देण्यात आली. पुढे २०२२ मध्ये त्यांची राष्ट्रवादी महिला काँग्रेस प्रदेशाध्यक्षपदी नियुक्ती करत त्यांना महिलांच्या प्रश्नांसाठी शरद पवारांकडून ताकद देण्यात आली.
अजित दादांच्या बंडाने पक्षाची संघटना डळमळीत झाली असता महिला आघाडीची संघटनात्मक बांधणी करण्याचं आव्हान विद्या चव्हाणांवर आहे. या अनुभवी महिला नेत्यांसोबतच तरुण तडफदार असलेली सक्षणा सलगर नावाची युवतीही पवारांना बळ देताना दिसते.
सक्षणा सलगर:
२०१२ साली सक्षणा यांची वयाच्या अवघ्या २१ व्या वर्षी जिल्हा परिषद सदस्य म्हणून निवड झाली. २०१७ ला सलग दुसऱ्यांदा त्यांना जिल्हा परिषदेवर संधी मिळाली. यानंतर लगेचच पुढल्या वर्षी सक्षणा यांना राष्ट्रवादी युवतीचे प्रदेशाध्यक्ष करण्यात आलं. २०१९च्या निवडणुकीवेळी त्यांनी झंझावाती प्रचार केला यामुळे त्या चर्चेत आल्या. सलगर यांचा ओढा कायमच सुप्रिया सुळे आणि शरद पवार यांच्याकडे राहिला आहे. लोक माझे सांगाती या पुस्तकाच्या दुसऱ्या आवृत्तीच्या सोहळ्यात शरद पवारांनी अचानक पक्षाध्यक्ष पदावरून निवृत्त होण्याचा निर्णय घेतला त्यावेळी शरद पवारांच्या या निर्णयाविरोधात रस्त्यावर उतरून संघर्ष करण्यात सक्षणा सलगर अग्रेसर राहिल्या. राष्ट्रववादीतील फुटीनंतर त्यांनी अजित पवारांविरोधात आक्रमक पवित्रा घेतलेला दिसून येतो.
सक्षणा सलगरांकडे राष्ट्रवादीच्या स्टार प्रचारक म्हणून पाहिलं जातं. लाखोंच्या सभा गाजवण्याचा रेकॉर्ड त्यांच्या नावे आहे. आगामी निवडणुकीच्या दृष्टीने सक्षणा सलगरांसारख्या फायरब्रॅंड युवा नेत्याची उपस्थिती राष्ट्रवादीच्या फायद्याची ठरेल. आक्रमकपणा हीच ताकद असलेल्या सक्षणा सलगर आगामी काळात राष्ट्रवादीसाठी महाराष्ट्र ढवळून काढताना दिसू शकतात .
एकूणच काय तर, शरद पवारांनी ज्या नेत्यांना वेळोवेळी ताकद देत त्यांना राज्यातील मात्तबर नेते बनवलं, त्यांनीच पवारांना एकटं पाडलं. मात्र, फौजिया खान, वंदना चव्हाण, विद्या चव्हाण आणि सक्षणा सलगर या महिला नेत्यांनी अडचणीत आलेल्या शरद पवारांसोंबत उभं राहत आपली निष्ठा दाखवून दिली आहे.