विदर्भ ट्रॅव्हल्सच्या अपघातग्रस्त बसची यवतमाळच्या प्रादेशिक परिवहन कार्यालयात २४ जानेवारी २०२० रोजी नोंदणी झाली. बसचा परवाना २०२५पर्यंत वैध आहे. समृद्धी महामार्गावर झालेल्या अपघातानंतर बसच्या सर्व कागदपत्रांची तपासणी परिवहन विभागाकडून सुरू झाली. प्राथमिक चौकशीत; ३० जून रोजी बसचे पीयूसी वैध नव्हते. मात्र ३ जुलैला एम-परिवहन अॅपवर या बसचे प्रदूषण नियंत्रण प्रमाणपत्र ३० जून २०२४पर्यंत वैध दिसत आहे. १ जुलैला हे प्रमाणपत्र घेतल्याचीही नोंद आहे. ही अपघातग्रस्त बस यवतमाळच्या दरने बंधूंची असून पोलिस उपनिरीक्षक भास्कर दरने यांची पत्नी प्रगती यांच्या नावावर आहे.
नियम काय सांगतो?
शासनमान्य केंद्रांवर पीयूसी दिले जाते. हे प्रमाणपत्र मिळविण्यासाठी वाहन पीयूसी केंद्रावर घेऊन जाणे आवश्यक आहे. वाहनाची तपासणी करूनच पीयूसी केंद्रचालक प्रमाणपत्र वाहनधारकांना देतात. ही सर्व प्रक्रिया ऑनलाइन आहे. त्यामुळे रात्री जळून कोळसा झालेली बस दुसऱ्या दिवशी पीयूसी केंद्रावर गेली कशी, असा प्रश्न निर्माण झाला आहे.
बसची ३० मार्चला पीयूसीची मुदत संपली. १ जुलैला यवतमाळ येथील एका केंद्रावरून पीयूसी प्रमाणपत्र घेतल्याचे समजते. या प्रकरणाची चौकशी सुरू आहे. पीयूसी केंद्रचालक व बसमालक अशा दोघांनाही नोटीस पाठविण्यात आली आहे. त्यांचे उत्तर आल्यावर नेमके सत्य बाहेर येईल. दोषी आढळल्यास त्यांच्याविरुद्ध कारवाई करण्यात येईल.
-ज्ञानेश्वर हिरडे, उपप्रादेशिक परिवहन अधिकारी यवतमाळ
नंबर प्लेसह फोटो दिल्यास…
यवतमाळ शहरात अनेक पीयूसी सेंटर आहेत. त्याठिकाणी वाहन घेऊन जाणे आवश्यक आहे. त्याशिवाय तपासणी होत नाही. पण, काही ठिकाणी वाहनाचे नंबर प्लेटसह वेगवेगळ्या बाजूने फोटो काढून दिले तर वाहन केंद्रांवर घेऊन जाण्याची गरज नाही. अपघातग्रस्त बसचे पीयूसी काढताना हीच पद्धत वापरली गेल्याचा आरोप होत आहे. चौकशीतून नेमके सत्य बाहेर येईल, असा विश्वासही यानिमित्ताने व्यक्त होत आहे.खाक झालेल्या बसच्या बाबतीत अशाच प्रकार झाल्याचे दिसत आहे .अपघाताची चौकशी सुरू झाल्याने हे सर्व समोर येईल