पक्षशिस्तीचा भंग केल्याप्रकरणी तसेच पक्ष आदेशाच्या विरोधात जाऊन वेगळी भूमिका घेतल्याने ९ आमदारांच्या विरोधात शरद पवार आणि जयंत पाटील यांनी कारवाईचा बडगा उगारण्याचे संकेत दिले होते. तसेच सुनील तटकरे आणि प्रफुल पटेल यांच्या हकालपट्टीचे ट्विटही पवारांनी केले. याच पार्श्वभूमीवर आमदारांमध्ये घबराट निर्माण होऊ नये तसेच आमदारांची चलबिचल होऊन त्यांनी पुन्हा माघारी फिरु नये, यासाठी अजित पवार यांनी आपली भूमिका स्पष्ट करताना माझ्या सोबत येण्याच्या भूमिकेने आमदारांवर कोणतीही कारवाई होणार नाही, याची मी काळजी घेईन, असा शब्द आमदारांना दिला.

शिंदे फडणवीस सरकारमध्ये सामिल झाल्यानंतर अजित पवार यांनी पुढचं पाऊल टाकलंय. अजित पवार यांच्या गटाने जयंत पाटील यांना प्रदेशाध्यक्षपदावरुन हटवून त्यांच्या जागी सुनील तटकरे यांची नियुक्ती केली आहे. आजच जयंत पाटील यांनी प्रदेशाध्यक्षपदाचा हँडओव्हर तटकरे यांना द्यावा, अशी सूचना राष्ट्रवादीचे कार्यकारी अध्यक्ष प्रफुल पटेल यांनी केली आहे. अजित पवारांच्या गटाकडून महिला प्रदेश अध्यक्षपदी रुपाली चाकणकर, प्रदेश प्रवक्तेपदी अमोल मिटकरी, प्रतोदपदी अनिल पाटील, युवक राष्ट्रवादी काँग्रेसच्या अध्यक्षपदी सुरज चव्हाण यांची निवड करण्यात आल्याची माहिती सुनील तटकरे यांनी दिली.