राष्ट्रवादी काँग्रेस पक्षातील बहुतांश आमदारांच्या अस्वस्थतेतून पक्षात मोठी फूट पडते किंवा कसे? असे वातावरण काही महिन्यांपूर्वी होते. त्या पार्श्वभूमीवर पक्षाध्यक्ष शरद पवार यांनी अध्यक्ष पदाचा राजीनामा देत, आपण राजकारणातून निवृत्त होत असल्याची घोषणाही केली होती. त्याच कार्यक्रमात युवक राष्ट्रवादीच्या कार्यकर्त्यांनी या निर्णयाला विरोध करत उपोषणाचीही धमकी दिली होती. पक्षाचे शक्तिशाली नेते अजित पवार यांनी त्यावेळी साहेबांना नवे नेतृत्व आणायचे असल्यास तुम्ही विरोध करणारे कोण, असा सवाल करत या राजीनामानाट्याच्या दरम्यानच अनेकांना त्यावेळी झापले होते.

सुप्रियाताईंच्या नावाची घोषणा, अजित पवारांची मान खाली, ‘नो कमेंट्स’ म्हणालेले दादा म्हणतात…

अजित पवार यांच्यावर महाराष्ट्रातील राजकीय निर्णय घेण्याची जबाबदारी देऊन सुप्रिया सुळे यांच्याकडे अध्यक्षपद दिले जाईल, असा अनेकांचा त्यावेळी होरा होता. मात्र, पवार यांच्या राजकीय गुगलीने पुन्हा एकदा भल्या भल्या मंडळीचा त्रिफळा उडवल्याचे दोनच दिवसांत सिद्ध झाले होते. राष्ट्रवादी काँग्रेसचा मुख्य जनाधार हा केवळ महाराष्ट्रातच असल्याने या पक्षात राहून राष्ट्रीय पातळीवर राजकारण करण्याला मर्यादा असल्याने, सुळे यांच्यावर राष्ट्रीय कार्याध्यक्ष या पदासोबतच महाराष्ट्राची जबाबदारी देण्यात आली आहे. त्यातच लोकसभा निवडणुकीच्या तयारीचीही जबाबदारीही सुळे यांच्याकडे दिली गेल्याने निवडणुकीच्या तिकीटवाटपातही त्यांचा वरचष्मा राहणार असल्याचे बोलले जाते. महाराष्ट्रातील प्रदेशाध्यक्ष जयंत पाटील हे देखील सुळे यांच्याच मर्जीतले मानले जातात.

Sharad Pawar : शरद पवारांनी अखेर भाकरी फिरवलीच! सुप्रिया सुळे, प्रफुल्ल पटेल पक्षाचे कार्यकारी अध्यक्ष

राष्ट्रवादी काँग्रेसने शनिवारी जाहीर केलेल्या जबाबदाऱ्यांमध्ये सुळे यांचे विश्वासू समजले जाणारे जितेंद्र आव्हाड यांच्यावरही बिहारसह अन्य काही राज्यांची जबाबदारी तसेच एसएसटी सेल, ओबीसी सेल यांचीही जबाबदारी देण्यात आलेली आहे.या सगळ्या पार्श्वभूमीवर सुप्रिया सुळे या नावावर आता राष्ट्रवादी काँग्रेसच्या शरद पवार यांच्या नंतरच्या सर्वात शक्तिशाली नेत्या म्हणून शिक्कामोर्तब झाल्याचे पक्षातील बहुतांश सगळ्या नेत्यांनी मान्य केल्याचे त्यांनी ‘मटा’शी बोलताना सांगितले.