म. टा. प्रतिनिधी, पुणे : खडकी येथील वाहतुकीस अडथळा ठरणाऱ्या दोन रेल्वे अंडरब्रिजचे काम करण्यासाठी पुणे महापालिका सरसावली आहे. खडकी कँन्टोन्मेंट आणि रेल्वे प्रशासनाबरोबर प्राथमिक चर्चा झाली असून या दोन पुलांसाठी सुमारे ३० कोटी रुपये खर्च अपेक्षित आहे. औंध-बाणेर-पाषाण येथून येणाऱ्या वाहनांना खडकी, नाशिक रस्ता, आंळदी, येरवडा तसेच नगर रस्त्याकडे जाण्यासाठी खडकी हा पर्यायी रस्ता आहे. मात्र, खडकीत पोहोचण्यासाठी खडकी रेल्वे स्टेशनजवळील दोन रेल्वे अंडरब्रिज खालून जावे लागते. अत्यंत जुने असलेले हे पूल अरुंद असल्याने याठिकाणाहून वाहनांना सहज प्रवास करता येत नाही. त्यामुळे केवळ या अरुंद पुलांमुळे वाहन चालकांना त्रास सहन करावा लागतो. जड वाहनांना तर येथून प्रवासही करता येत नाही. या पार्श्वभूमीवर महापालिका आयुक्त विक्रमकुमार यांनी मंगळवारी खडकी कँन्टोन्मेंट प्रशासनाशी चर्चा केली असून, त्यामध्ये या दोन्ही पुलांची कामे करण्यासाठी तत्त्वत: तयारी दर्शविण्यात आली आहे.देशभरातील कॅन्टोन्मेंट हे तेथील स्थानिक स्वराज्य संस्थांमध्ये विलीन करण्याच्या हालचाली वेगाने सुरू आहेत. त्यानुसार खडकी कॅन्टोन्मेंटचे भविष्यात पुणे महापालिकेत विलीनीकरण होण्याची शक्यता आहे. महापालिकेने यापूर्वी घोरपडी आणि हडपसर येथील रेल्वे उड्डाणपुलांची कामे करण्यास घेतली आहेत. या पार्श्वभूमीवर वाहतूक कोंडी फोडण्यासाठी खडकी येथील या दोन्हीही रेल्वे अंडर ब्रिज नव्याने तयार करण्याची आवश्यकता व्यक्त होत आहे.

Pune News : पुण्यात बड्या IAS अधिकाऱ्याला अटक; बंगल्यात सापडली तब्बल इतक्या कोटींची कॅश, मोजून अधिकारीही दमले!

या पुलांसाठी सुमारे ३० कोटी रुपये खर्च अपेक्षित असून हा निधी रेल्वेकडे वर्ग करावा लागणार आहे. त्यानंतर रेल्वेकडून त्याठिकाणी निविदा प्रक्रिया राबवून या पुलांची निर्मिती करण्यात येईल, अशी माहिती उच्चपदस्थ सूत्रांनी दिली.

अतिक्रमण कारवाई होणार

खडकी परिसरात काही प्रमुख रस्त्यांवर अतिक्रमण असून त्याचा फटका वाहतुकीस बसतो आहे. याठिकाणचे अतिक्रमण काढण्यासाठी महापालिका आणि खडकी कॅन्टोन्मेंट संयुक्त कारवाई करणार आहे. या बैठकीत याठिकाणचे अतिक्रमण काढण्याबाबत प्राथमिक चर्चा झाली आहे.

दरम्यान, ‘खडकी येथील रेल्वे अंडर ब्रिज नव्याने तयार करण्यासाठी महापालिकेने तयारी दर्शविली आहे. त्यासाठी सुमारे ३० कोटी रुपये खर्च अपेक्षित आहे. या पुलांची कामे झाल्यास त्याचा मोठा दिलासा पूर्व आणि पश्चिम भागाला मिळणार असून, आणखी एक सक्षम पर्यायी रस्ता तयार होणार आहे,’ असं महापालिका आयुक्त तथा प्रशासक विक्रमकुमार यांनी म्हटलं आहे.