घाटकोपर व अंधेरी पश्चिमेकडील वर्सोवा यांना जोडणाऱ्या मेट्रो १ मार्गिकेचा अंधेरी-घाटकोपर लिंक रोडवरील गर्दी कमी करण्यात उपयोग झाला आहे. मात्र एकूणच वाहनांची संख्या खूप अधिक असल्याने हा रस्ता कायम वर्दळीचा असतो. त्यातच पूर्व उपनगरांमधून विमानतळाकडे थेट टर्मिनलपर्यंत जाणारे चारचाकीचा उपयोग करताना मेट्रो ६ च्या कामातील अडथळ्यांमुळे पवईऐवजी याच रस्त्याने सहसा विमानतळ गाठतात. त्यामुळेच या मार्गावरील वाहतूक कोंडी कायम आहे. नव्या जोडपुलामुळे ही गर्दी कमी होणार आहे.

जागृतीनगर भागातील स्थानिकांच्या म्हणण्यानुसार, सध्या जागृतीनगर स्थानकावर उतरुन एलबीएस दिशेने जाण्यासाठी रस्त्याच्या दुसऱ्या बाजूने जावे लागते. त्यामुळे जागृतीनगर जांभूळपाडा चौकात कोंडी होते. ती कोंडी घाटकोपरपर्यंत कायम असते. त्याचा फटका घाटकोपरहून मरोळ, विमानतळाच्या दिशेने जाणाऱ्यांनादेखील बसतो. यासाठीच या मार्गावर कुठेतरी उड्डाणपूल किंवा जोडपुलाची गरज होतीच. मात्र तेवढी जागा फक्त जागृतीनगर स्थानकाजवळ होती. त्यामुळे तेथे हा जोडपूल उभा करण्यात आला आहे. त्यामुळे काही प्रमाणात तरी कोंडी कमी होण्यास मदत होईल.