वर्धा: परभणी येथून नागपूरला आरोपी घेऊन जाणाऱ्या हरियाणा राज्यातील पंचकुला येथील पोलिसांच्या पोलिस वाहनाला समृद्धी महामार्गावर भीषण अपघात झाला आहे. पोलिस वाहनाला ट्रकला मागून धडक दिल्याने हा भीषण अपघात झाला. समृद्धी महामार्गावर पांढरकवढा गावानजीक सकाळ दरम्यान ही घटना घडली. अपघातात महिला पोलिस निरीक्षकाचा मृत्यू झाला आहे. तीन कर्मचारी आणि आरोपी गंभीर जखमी झाला आहे.पोलिस निरीक्षक नेहा चव्हाण असे मृतकाचे नाव आहे. तर, सहाय्यक पोलिस उपनिरीक्षक सुखविंद्रसिंह, मिठ्ठू जगडा, चालक शम्मी कुमार आणि आरोपी वैद्यनाथ शिंदे हे गंभीर जखमी झाले. सर्व जखमींवर सावंगी येथील रुग्णालयात उपचारार्थ दाखल करण्यात आल्याची माहिती सावंगी पोलिसांनी दिली.

भिवंडीत तीन मजली इमारत कोसळली, दोघांचा मृत्यू, ८ जणांना ढिगाऱ्यातून सुखरुप बाहेर काढलं
हरियाणा येथील पंचकुला पोलिस ठाण्यातील पोलिस निरीक्षक नेहा चव्हाण आणि त्यांचे तीन कर्मचारी परभणी येथून फसवणुकीच्या गुन्ह्यातील आरोपी वैद्यनाथ शिंदे याला घेऊन एचआर. ०३ जी.व्ही. १७८२ क्रमांकाच्या बोलेरो पोलिस वाहनाने नागपूरकडे जात होते. समृद्धी महामार्गाने जात असताना पांढरकवडा गाव परिसरात पोलिस वाहन समोरील ट्रकला मागाहून धडकले. या भीषण अपघातात पोलिस वाहनाचा समोरील भाग चेंदामेंदा झाला.

समृद्धी महामार्गावर अपघातांना आळा बसण्यासाठी नवे नियम; याच वाहनांना मिळणार प्रवेश

या अपघातात पोलिस निरीक्षक नेहा चव्हाण यांचा जागीच मृत्यू झाला. तर पोलिस कर्मचारी आणि आरोपी गंभीर जखमी झाले. अपघाताची माहिती मिळताच सावंगी पोलिस ठाण्याचे पोलिस निरीक्षक धनाजी जळक, संदीप खरात हे कर्मचाऱ्यांसह अपघातस्थळी दाखल झाले. तसेच जाम महामार्ग पोलिसही अपघातस्थळी दाखल झाले. सर्व जखमींना तत्काळ सावंगी येथील रुग्णालयात उपचारार्थ दाखल केले. तसेच आरोपी ट्रकचालकास पोलिसांनी अटक केली.

घटनास्थळी जात सावंगी पोलिसांनी अपघातग्रस्त पोलिस वाहन ताब्यात घेतले आहे. तसेच पोलिस अधिकाऱ्याकडे असलेली १ ग्लॉक ९ एमएम पीस्टल आणि १५ राऊंड सुरक्षितरित्या ताब्यात घेतल्याची माहिती पोलिस निरीक्षक धनाजी जळक यांनी दिली.

रुग्णालयात नेणाऱ्या आईनेच संपवलं, पोस्टमार्टम रिपोर्ट वाचून पोलिसांच्या पायाखालची जमीन सरकली