सद्यस्थितीत जळगाव शहरात भाजपचे सुरेश भोळे हे आमदार आहेत. आता मंत्री गुलाबराव पाटील यांचा मुलगा प्रतापराव पाटील यांचे बॅनर लागल्याने आगामी विधानसभा निवडणूक प्रतापराव पाटील हे जळगाव शहरातून लढतात का? वडील जळगाव ग्रामीण आणि मुलगा जळगाव शहरातून विधानसभा लढणार का? भाजप शिंदे गटाची राज्यात युती आहे तर मग अशा स्थितीत जळगाव शहर विधानसभेची जागा ही शिंदे गटाला की भाजपला मिळणार? असे वेगवेगळे प्रश्न उपस्थित होत आहेत. मात्र आगमी काळात काय राजकीय घडामोडी घडतात त्यानंतर जळगाव जिल्ह्याचे राजकारणात काय बदल होतात हे पाहणं महत्वाचं असणार आहे.

वडिलांकडून वारसा, आक्रमक राजकारणाचं बाळकडू, कोण आहेत प्रतापराव पाटील?

प्रतापराव पाटील यांचे वडील गुलाबराव पाटील यांची शिवसेनेत मुलुख मैदान तोफ म्हणून ओळख आहे. वडिलांकडूनच प्रतापराव पाटील यांना राजकीय वारसा मिळाला आणि शिवसेनेतच प्रतापराव पाटील यांचे कार्यकर्ते म्हणून राजकीय प्रवासाला सुरुवात झाली. २०१७ मध्ये प्रतापराव पाटील यांनी पाळधी बांभोरी या जिल्हा परिषद गटातून जिल्हा परिषद सदस्य पदासाठी पहिल्यांदाच निवडणूक लढवली. या निवडणुकीत त्यांनी राष्ट्रवादीच्या उमेदवाराचा पराभव करत प्रचंड मताधिक्याने विजय मिळवला.

आंदोलनाच्या आक्रमक शैलीमुळे गुलाबराव पाटील हे संपूर्ण राज्याला परिचित आहेत. त्याचप्रमाणे प्रतापराव पाटील हे सुद्धा आक्रमक शैलीमुळे जिल्ह्यात परिचित आहेत. महावितरण कंपनीच्या विरोधात आंदोलन असो की शेतकऱ्यांच्या प्रश्नासाठी थेट कार्यालयावर मोर्चा, थेट अधिकाऱ्याला धारेवर धरणे असो… यामुळे प्रतापराव पाटील यांची जिल्ह्यात चांगली ओळख आहे.