पाण्यावर तरंगणाऱ्या बाबाचा पर्दाफाश, अंनिस कार्यकर्ते पोहोचले अन् थेट ‘तो’ डेमो दाखवला
सत्यपाल महाराज चक्क स्वत: गरम तव्यावर बसवून व्हिडिओ बनवत म्हणाले की बाबाहो.. आपण ऐकलं अन् पाहिलं आजकाल महाराज गरम तव्यावर बसतात, अन् शकले गेले, गरम लागायला लागलं की ते शिव्या देतात. पुढे म्हणाले की आज मी ज्या तव्यावर बसलो आहे, त्या तव्याखाली जाळ लावायला सांगितला. या धगधगणाऱ्या चुलीवरील तव्यावर महाराज तब्बल पावणे तीन तास बसले आणि हा सगळा भंपकपणा असल्याचं महाराजांनी जाहीर केलं.

महाराज म्हणाले की मी तव्यावर बसण्यापूर्वी एक तव्याच्याच रंगाचा काळा कापड ओला करून तव्यावर ठेवला. मी स्वतः जो टॉवेल गुंडाळला होता तो आणि माझी अंतर्वस्त्र सुद्धा ओली करून घेतली होती. त्यानंतर तव्यावर बसलो (तो तथाकथित महाराजही असच करायचा) आणि तव्याच्या एका बाजूलाच जाळ केला. मात्र त्यापासून थोड्या अंतरावर बसलो. त्यामुळे अशा प्रकारे तव्यावर कुणालाही बसता येईल. हा कुठलाही चमत्कार नसून ही सगळी फसवेगिरी आहे.

गरीब भोळ्या भक्तांच्या श्रद्धेचा फायदा घेत असे बोगस बाबा लोकांना लुबाडत असतात. काही वेळानंतर चटका नक्कीच लागतो. पण मग तेव्हा तो बाबा घाणेरड्या शिव्या द्यायला लागायचा, जेणेकरून लोक त्याला त्यावरून उचलून घेत होते. ही सरळ धूळफेक असून अशा प्रकारे सवंग प्रसिद्धी हे बाबा लोक घेत असतात.

कोण होता चुलीवरचा बाबा?

काही दिवसांपूर्वी राज्यभरात चुलीवरचे बाबा चर्चेत आले होते. चक्क चुलीवर तापलेल्या तव्यावर बसून भक्तांना आशीर्वाद आणि घाणेरड्या शिव्या देणाऱ्या महाराजाचा एक व्हिडिओ चांगलाचं व्हायरल झाला होता. तो व्हिडिओ अमरावती जिल्ह्यातील मार्डी येथील गुरूदासबाबा याचा होता. तो व्हिडिओ महाशिवरात्रीतला असल्याचा दावा केला जातो. व्हिडिओ व्हायरल झाल्यानंतर मी कुठलंही अंधश्रद्धेचं काम करत नाही. मला दैवी शक्ती प्राप्त होते, त्यावेळी मला भान नसतं. मी अंधश्रद्धा पसरवत नाही, हा श्रद्धेचा भाग आहे. मी साधू संत नाही, असा दावा त्यावेळी या बाबाने केला होता.

चुलीवर बसलेल्या बाबाच्या आजुबाजूला लोकांची गर्दीही दिसत होती. हा बाबा स्वतःला सच्चिदानंद गुरुदास महाराज असं म्हणून घेतो. त्याचं खरं नाव सुनील कावलकर असं असल्याचं समजतं. तो पूर्वी मजुरी काम करायचा. आता पंधरा वर्षांपासून त्याने स्वतःला बाबा घोषित केल्याचं कळतं. आता या बाबाने चक्क चुलीवर बसण्याचा प्रकार केला. तव्याखाली चूल पेटत आहे आणि बाबांच्या एका हातात विडी आहे. विडी ओढत ओढत बाबा पाया पडायला येणाऱ्या भक्तांना आशिर्वाद देत असल्याचं व्हिडिओमध्ये दिसत होतं. त्याचा गरम तव्यावर बसून घाणेरड्या शिव्या देण्याचा व्हिडिओ व्हायरल झाल्यावर अंधश्रद्धा निर्मूलन समिती आणि पोलिसांच्या भीतीने हा बाबा नंतर गायब झाला आहे.