यावेळी उपलब्ध जागेची पाहणी करून चार्जिंग स्टेशन उभारणीसाठी आवश्यक उपाययोजना तातडीने पूर्ण करण्याच्या सूचना देण्यात आल्या. तसेच चार्जिंग स्टेशन पूर्णत्वास येईपर्यंत पर्यायी चार्जिंग व्यवस्था उपलब्ध करून बस लवकरात लवकर प्रवासी सेवेत दाखल करण्यासाठी सर्व पर्यायांचा विचार करण्याबाबत महापौरांनी चर्चा केली. ठाणे महानगरपालिकेच्या परिवहन सेवेत दाखल झालेल्या पहिल्या वातानुकूलित डबल डेकर ई-बससह आगामी ई-बस आणि सीएनजी बस प्रकल्पाच्या अनुषंगाने आवश्यक पायाभूत सुविधांचा आढावा महापौर पिंपळोलकर यांनी गुरुवारी वागळे येथील परिवहन आगारात घेतला. यावेळी सभागृह नेते हणमंत जगदाळे, शिवसेना गटनेते पवन कदम, नगरसेवक अनिल भोर, अतिरिक्त आयुक्त (२) प्रशांत रोडे तसेच परिवहन विभागाचे अधिकारी व कर्मचारी उपस्थित होते. महाराष्ट्र दिनी उपमुख्यमंत्री डॉ. एकनाथ शिंदे यांच्या हस्ते ठाणे परिवहन सेवेतील पहिल्या वातानुकूलित डबल डेकर ई-बसचे लोकार्पण करण्यात आले होते. या बसची प्रात्यक्षिक चाचणीही घेण्यात आली होती. मात्र, नियमित सेवेसाठी आवश्यक असलेल्या स्वतंत्र चार्जिंग स्टेशनच्या अभावी ही बस सध्या आनंदनगर आगारात ठेवण्यात आली आहे. त्यामुळे बसच्या परिचालनासाठी आवश्यक सुविधा उपलब्ध करून देण्याच्या दृष्टीने महापौरांनी ही पाहणी केली.

Mumbai Metro: महामुंबईत 14 मार्गांवर 300 किमी लांब ‘मेट्रो नेटवर्क’ उभारणार; वर्षाअखेरीस 120 किमीचा टप्पा होणार पार

पर्यायी उपायांवर चर्चा

डबल डेकर, ई-बस आणि सीएनजी बससाठी आवश्यक सुविधा उभारण्याचे काम प्राधान्याने सुरू आहे. काही तांत्रिक बाबी निदर्शनास आल्या असून याबाबत संबंधित विभाग, महावितरण व कंत्राटदार संस्थांशी समन्वय साधला जात आहे. चार्जिंग स्टेशन उभारणीसाठी काही कालावधी लागू शकतो. मात्र, बससेवा सुरू व्हावी, यासाठी पर्यायी उपायांवर विचार सुरू असल्याचे प्रशासनाने स्पष्ट केले.

निर्धारित वेळेत कामे पूर्ण करा

राज्य सरकारच्या आदेशानुसार ठाणे परिवहन सेवेत आगामी काळात डबल डेकर ई-बस तसेच १०० सीएनजी बसचा समावेश करण्यात येणार आहे. या पार्श्वभूमीवर बस आगारातील कामे, चार्जिंग स्टेशन उभारणी, सीएनजी सुविधा आणि इतर पायाभूत सुविधांची सद्यस्थिती जाणून घेण्यासाठी आढावा बैठक घेण्यात आली. चार्जिंग स्टेशन उभारणी, बस उपलब्धता आणि सेवा सुरू करण्यासंदर्भातील जबाबदाऱ्या कंत्राटदार संस्थेने निर्धारित वेळेत पूर्ण कराव्यात, याबाबत चर्चा करण्यात आल्याची माहिती सभागृहनेते हणमंत जगदाळे यांनी दिली. तसेच प्रकल्पाशी संबंधित सर्व कामे वेळेत पूर्ण करण्याचे आदेश अतिरिक्त आयुक्त प्रशांत रोडे यांनी संबंधित अधिकारी आणि कंत्राटदार संस्थेला दिले.

Goregaon-Mulund Link Roadवरील जुळ्या बोगद्यांचं काम सुरू होणार, शहरातील चौथा ‘ईस्ट-वेस्ट’ कॉरिडोर; डेडलाइन समोर

पाहणीनंतर आढावा बैठक

महापौरांच्या उपस्थितीत झालेल्या बैठकीत ई-बस, डबल डेकर ई-बस तसेच आगामी सीएनजी बस सेवांसाठी आवश्यक चार्जिंग स्टेशन, इंधन सुविधा आणि इतर तांत्रिक बाबींचा सविस्तर आढावा घेण्यात आला. डबल डेकर ई-बससाठी स्वतंत्र चार्जिंग स्टेशन उभारण्याची प्रक्रिया सुरू असून त्यासाठी आवश्यक जागा, वीजपुरवठा आणि तांत्रिक बाबींचे नियोजन करण्यात येत असल्याची माहिती प्रशासनाने दिली.