नवी मुंबई आंतरराष्ट्रीय विमानतळाच्या टर्मिनल-१ येथे छत्रपती शिवाजी महाराजांच्या भव्य कांस्य पुतळ्याचे मुख्यमंत्री देवेंद्र फडणवीस यांच्या हस्ते अनावरण करण्यात आले. १२ फूट उंच पुतळा आणि ८ फूट उंच चौथरा विमानतळाचे नवे आकर्षण ठरणार आहे.
नवी मुंबई आंतरराष्ट्रीय विमानतळ प्रकल्पाच्या माध्यमातून आधुनिक सुविधांसोबत महाराष्ट्राच्या सांस्कृतिक वारशालाही स्थान देण्याचा प्रयत्न करण्यात आला आहे. त्याचाच भाग म्हणून शिवरायांचा भव्य अर्धपुतळा विमानतळ परिसरात उभारण्यात आला आहे. महाराष्ट्राच्या अस्मितेचे प्रतीक असलेल्या या स्मारकामुळे विमानतळाला ऐतिहासिक आणि सांस्कृतिक स्पर्श मिळाला आहे.
मान्यवरांची उपस्थिती
या अनावरण सोहळ्याला राज्यातील मंत्री, लोकप्रतिनिधी आणि वरिष्ठ अधिकारी उपस्थित होते. वनमंत्री गणेश नाईक, महिला व बालविकास मंत्री अदिती तटकरे, आमदार प्रशांत ठाकूर, आमदार महेश बालदी, माजी खासदार रामशेठ ठाकूर यांच्यासह विमानतळ प्रशासन आणि सिडकोचे अधिकारी कार्यक्रमाला उपस्थित होते.
आठ महिन्यांच्या परिश्रमातून साकारले स्मारक
दरम्यान, विमानतळावर उभारण्यात आलेल्या या स्मारकात आठ फूट उंच चौथऱ्यावर बारा फूट उंचीचा ब्राँझमधील अर्धपुतळा बसविण्यात आला आहे. नवी मुंबईतील शिल्पकार नितीन गोर्डे यांनी हे शिल्प साकारले आहे. राज्याच्या मान्यताप्राप्त प्रतिकृतीच्या आधारे तयार करण्यात आलेल्या या पुतळ्यासाठी तांबेमिश्रित धातूचा वापर करण्यात आला आहे. हे स्मारक पूर्ण करण्यासाठी आठ महिन्यांहून अधिक कालावधी लागल्याची माहिती त्यांच्याकडून यावेळी देण्यात आली.
विमानतळाची नवी ओळख
विमानतळ प्रशासनाच्या मते, हा पुतळा केवळ सजावटीसाठी तिथे बसवण्यात आला नसून महाराष्ट्राची परंपरा, इतिहास आणि स्वाभिमान जगासमोर मांडणारे प्रतीक ठरणार आहे. भविष्यात लाखो प्रवासी या विमानतळावरून प्रवास करणार असून त्यांचे स्वागत छत्रपती शिवाजी महाराजांच्या प्रेरणादायी प्रतिमेद्वारे होणार आहे. त्यामुळे हे स्मारक नवी मुंबई विमानतळावरील प्रवाशांसाठी प्रमुख आकर्षण म्हणून उदयास येण्याची शक्यता आहे.
लेखकाबद्दलसुनिल लाटेसुनिल प्रभाकर लाटे हे ‘महाराष्ट्र टाइम्स ऑनलाइन’मध्ये कन्सल्टंट या पदावर कार्यरत आहेत. ते गेल्या तीन वर्षांपासून पत्रकारिता क्षेत्रात सक्रिय आहेत. महाराष्ट्र टाइम्स ऑनलाइनमध्ये ते स्थानिक बातम्या, लाइव्ह ब्लॉग कव्हरेज, गुन्हेगारी, राजकारण, देश-विदेश, सरकारी योजना, तसेच इन्फ्रास्ट्रक्चर आणि नागरी विकासाशी संबंधित विषयांवर नियमित लेखन करतात. २०२२ मध्ये पत्रकारितेचे शिक्षण पूर्ण केल्यानंतर त्यांनी आपल्या कारकिर्दीची सुरुवात ‘लोकसत्ता ऑनलाइन’ (मुंबई) येथून केली.सुनिल यांनी राजकारण, मनोरंजन, क्रीडा आणि गुन्हेगारी अशा विविध विषयांचे वार्तांकन व विश्लेषण प्रभावीपणे केले आहे. हायपरलोकल न्यूज, क्राईम रिपोर्टिंग, राजकारण आणि चालू घडामोडींवरील नाविन्यपूर्ण डिजिटल कंटेंट लिहिण्याचा त्यांना दांडगा अनुभव आहे. त्यांनी डॉ. बाबासाहेब आंबेडकर मराठवाडा विद्यापीठाच्या वृत्तपत्रविद्या विभागातून पत्रकारितेतील पदव्युत्तर शिक्षण (MA) पूर्ण केले आहे. शिक्षण घेत असतानाच त्यांनी ‘दैनिक दिव्य मराठी’ आणि ‘दैनिक पुण्य नगरी’ यांसारख्या नामांकित वृत्तपत्रांसाठी बातम्या लिहून प्रत्यक्ष कामाचा अनुभव घेतला. यादरम्यान त्यांनी प्रामुख्याने शिक्षण क्षेत्रातील बातम्यांचे कव्हरेज केले.अचूक आणि प्रभावी डिजिटल रिपोर्टिंग ही सुनिल यांची खासियत आहे. गेल्या तीन वर्षांत त्यांनी उत्कृष्ट ‘न्यूज सेन्स’ आणि ‘ब्रेकिंग न्यूज’ कव्हरेजचे संपादन कौशल्य विकसित केले आहे. महाराष्ट्र टाइम्स ऑनलाइनमध्ये काम करताना वेगवान अपडेट्स देणे आणि डिजिटल वाचकांना समजेल अशा सोप्या शैलीत घडामोडींची मांडणी करणे, यात त्यांनी प्राविण्य मिळवले आहे. पत्रकारितेतील नवनवीन तंत्रे शिकून स्वतःला अधिक सक्षम बनवण्यावर त्यांचा सतत भर असतो.पत्रकारितेसोबतच त्यांना फोटोग्राफी, व्हिडिओ एडिटिंग आणि ग्राफिक्स डिझाइनची विशेष आवड असून, जाहिरात क्षेत्रातही त्यांनी काम केले आहे. सर्जनशील लेखनाची ओढ असलेल्या सुनिल यांनी काही लघुपटांचे दिग्दर्शन आणि पटकथा लेखनही केले आहे. तसेच, संगीत आणि गायन क्षेत्रातही त्यांना विशेष रुची आहे.… आणखी वाचा