म्हसरूळ येथील मेहेरधाम भागातील यशोदानगर परिसरात ज्ञानेश्वरी राहुल गिरी (वय २०) या सासू पद्मा यांच्यासोबत वास्तव्यास आहेत. शुक्रवारी (दि. १०) दुपारी दीड वाजेच्या सुमारास ज्ञानेश्वरी आणि त्यांच्या सासू घरात जेवण करीत असताना दरवाजाची बेल वाजली. ज्ञानेश्वरी यांनी दरवाजा उघडला असता समोर तोंडाला स्कार्फ बांधलेली एक अनोळखी महिला उभी होती. त्या महिलेने खोटी ओळख सांगितली. ‘मी वरच्या मजल्यावर राहणाऱ्या गोसावींची पुतणी आहे. गॅस संपला असून, पापड बनवण्यासाठी थोडे तेल गरम करून द्या’, अशी विनंती केली.

Nashik News: नाशकात 22 वर्षीय परिचारिकेचं टोकाचं पाऊल; रुग्णालयाच्या निवासस्थानात दिला जीव
ज्ञानेश्वरी यांनी शेजारधर्म आणि माणुसकीच्या नात्याने त्या महिलेला मदत करण्याचे ठरवले. त्यांनी महिलेकडून तेलाचे पातेले घेतले आणि स्वयंपाकघरात नेऊन तेल गरम करून दिले. मात्र, ‘तेल अजून हवे तसे कडक झाले नाही’, असे सांगून त्या संशयित महिलेने पुन्हा तेल गरम करण्यास भाग पाडले. ज्ञानेश्वरी दुसऱ्यांदा तेल कडक करून त्या महिलेला देण्यासाठी आल्या. त्या महिलेने अचानक तेलाच्या पातेल्याला खालून जोरात धक्का दिला. त्यामुळे उकळते तेल ज्ञानेश्वरी यांच्या चेहऱ्यावर आणि शरीरावर उडाले. एवढ्यावरच न थांबता, त्या महिलेने ज्ञानेश्वरी यांचा गळा दाबून त्यांना ठार मारण्याचाही प्रयत्न केला.

घरात सुरू असलेला हा थरार पाहून ज्ञानेश्वरी यांच्या सासूने आरडाओरड केली. त्यांचा आवाज ऐकून परिसरातील नागरिक तातडीने मदतीला धावून आले. पळून जाण्याच्या प्रयत्नात असलेल्या त्या महिलेला नागरिकांनी जागीच पकडले. जेव्हा तिचा स्कार्फ काढण्यात आला, तेव्हा समोरचे दृश्य पाहून सर्वांनाच धक्का बसला. ती महिला अज्ञात नसून, ज्ञानेश्वरी यांची मावस सासू यशोदा ज्ञानेश्वर गोसावी (वय ३६, रा. पिंपळगाव बसवंत) असल्याचे निष्पन्न झाले.

Nashik Accident: जागरण-गोंधळावरुन परतताना काळाचा घाला! पिकअपने घेतला पेट; नवदाम्पत्यासह चौघांचा होरपळून मृत्यू, 7 जण जखमी
घटनेची माहिती मिळताच ‘डायल ११२’ चे पथक आणि उपनिरीक्षक क्षीरसागर तातडीने घटनास्थळी दाखल झाले. पोलिसांनी गंभीर भाजलेल्या ज्ञानेश्वरी यांना तातडीने रुग्णालयात दाखल केले. वैद्यकीय सूत्रांनी दिलेल्या माहितीनुसार, ज्ञानेश्वरी या सुमारे ३० टक्के भाजल्या असून, त्यांच्यावर उपचार सुरू आहेत. म्हसरूळ पोलिसांनी संशयित यशोदा गोसावीविरुद्ध गुन्हा दाखल करून त्यांना ताब्यात घेतले. हा हल्ला नेमक्या कोणत्या जुन्या वादातून किंवा रागातून करण्यात आला, याचा अधिक तपास पोलिस करीत आहेत.