सावंतवाडी शहरातील बिरोडकर टेंब परिसरातील १७ वर्षीय अल्पवयीन मुलाने गॅलरीतून उडी मारुन आयुष्य संपवल्याची घटना ताजी असतानाच गुरुवारी त्याच परिसरातील एका युवतीने व त्यानंतर लगेचच एका युवकाने गळफास घेऊन जीव दिल्याचा धक्कादायक प्रकार घडला आहे. या प्रकारामुळे सावंतवाडी शहर हादरले आहे.

नेमकं काय घडलं?

सावंतवाडी शहरातील बिरोडकर टेंब परिसरात राहणाऱ्या प्रांजल वैभव बिरोडकर (वय १८) या युवतीने गुरुवारी दुपारी अडीचच्या सुमारास राहत्या घरातील बंद खोलीत ओढणीच्या सहाय्याने गळफास लावून घेतल्याचे उघडकीस आले. यानंतर काही वेळातच संबंधित मुलीच्या जवळच्या नात्यातील अभिजीत तुकाराम बिरोडकर (वय २७, रा. बिरोडकर टेंब) या मुलाने देखील घरापासून काही अंतरावर असलेल्या चिवार टेकडी परिसरात एका उंच झाडावर साडीच्या सहाय्याने गळफास घेतल्याचे निदर्शनास आले. या दोन्ही प्रकारांमुळे बिरोडकर कुटुंबियांवर दुःखाचा डोंगर कोसळला आहे.

खोलीत बंद करुन जीव दिला

या प्रकरणी पोलिसांकडून मिळालेल्या माहितीनुसार, प्रांजल बिरोडकर हिने अलिकडेच १२ वीची परीक्षा दिली होती‌. त्यानंतर ती घरीच असायची. गुरुवारी दुपारी एका धार्मिक कार्यक्रमासाठी ती गेली होती. तिथून ती दुपारी २ च्या सुमारास घरी परतली. त्यानंतर जेवणाची वेळ होऊनही ती जेवायला येत नसल्याने आईने खोलीत जाऊन पाहिले असता दरवाजा बंद स्थितीत आढळून आला. याबाबत तिने नातेवाईकांना कल्पना दिली. त्यांनी दरवाजा उघडला असता ओढणीच्या सहाय्याने छताला गळफास घेतल्याचे आढळून आले. हा धक्कादायक प्रकार पाहताच कुटुंबीयांनी एकच टाहो फोडला. त्यानंतर तिला खाली उतरवून येथील उपजिल्हा रुग्णालयात उपचारार्थ दाखल करण्यात आले असता उपचारापूर्वीच तिचे निधन झाल्याची माहिती वैद्यकीय अधिकाऱ्यांनी दिली.

टेकडीवरच्या झाडावर तरुणाने जीवन संपवलं

दरम्यान, या प्रकाराची माहिती मिळाल्यानंतर तिच्या जवळच्या नात्यातील अभिजीत बिरोडकर हा आपल्या मित्रांसमवेत घटनास्थळी दाखल झाला. मात्र, काही वेळानंतर तो आढळून येत नसल्याने व त्याचा मोबाईल बंद स्थितीत दिसत असल्याने नातेवाईकांनी शोधाशोध सुरू केली. तसेच याबाबत सावंतवाडी पोलिसांना कल्पना दिली. पोलिसांनी त्वरित घटनास्थळी दाखल होत मोबाईल टॉवर लोकेशनचा शोध घेतला असता लगतच्या चिवार टेकडी परिसरात त्याचे लोकेशन आढळून आले. या परिसरात शोध घेतला असता एका उंच झाडावर साडीच्या सहाय्याने गळफास घेतलेल्या अवस्थेत अभिजितचं शव आढळून आलं.
Pune Crime : माझ्या नातीला सांभाळा, शेजाऱ्यांकडे चिमुरडीला सोपवून आजी ड्युटीवर; सकाळी दोघी मृतावस्थेत, आळंदीतून दुसरा नवरा ताब्यात
पोलिसांनी पंचनामा करून बॉडी ताब्यात घेत उत्तरीय तपासणीसाठी उपजिल्हा रुग्णालयात आणण्यात आले. यावेळी उपजिल्हा रुग्णालयात नातेवाईक तसेच शहरातील नागरिकांनी मोठ्या प्रमाणात गर्दी केली होती. बिरोडकर कुटुंबातील दोन लेकरांनी एकाच दिवशी आयुष्याची अखेर केल्यामुळे बिरोडकर कुटुंबियांवर दुःखाचा डोंगर कोसळला आहे. त्या दोघांनी हे टोकाचे पाऊल का उचलले असावे याबाबत पोलिसांकडून तपास सुरु आहे.

अभिजित बिरोडकर हा अलिकडेच शहरातील एका मोठ्या दुकानात कामाला होता. स्वभावाने तो अत्यंत मनमिळावू व हळवा होता. त्याच्या पश्चात आई, वडील, दोन बहिणी असा परिवार आहे. तर मृत प्रांजल बिरोडकर ही आई-वडीलांची एकुलती एक मुलगी होती. ती देखील स्वभावाने अतिशय मनमिळावू होती. तिच्या पश्चात आई, वडील, काका, काकी, आजी, आजोबा असा मोठा परिवार आहे.

बुधवारी याच परिसरातील एका अल्पवयीन विद्यार्थ्याने शिक्षणाला कंटाळून जीव दिल्याचे चिठ्ठी लिहून ठेवत संपवल्याची घटना ताजी असताना याच परिसरातील राहणाऱ्या जवळच्या नात्यातील मुला-मुलीने आत्महत्या केल्यानं पोलिसांसमोर तपासाचे मोठे आव्हान उभे राहिले आहे.
Ashok Kharat : जावईबापू कपडे काढा, लग्नाची हळद लावायचीय! अशोक खरात ऐकत नव्हता, सासुरवाडीतील किस्सा, वस्त्र उतरवताच दिसलेलं पाप
दरम्यान, या घटनेची फिर्याद मुलाचे काका दीपक बिरोडकर तर मुलीचे काका प्रशांत बिरोडकर यांनी सावंतवाडी पोलिसात दिली असून अधिक तपास पोलिस उपनिरीक्षक माधुरी मुळीक व पोलिस हवालदार महेश जाधव करीत आहेत.