सांताक्रूझ येथे शनिवारी ३५, तर कुलाबा येथे ३३.५ अंश सेल्सिअस कमाल तापमान नोंदले गेले. मुंबईचे कमाल तापमान सरासरीपेक्षा शनिवारी सांताक्रूझ येथे १.८, तर कुलाबा येथे १.९ अंशांनी अधिक होते. हा पारा रविवारी आणखी खाली उतरेल, असा अंदाज आहे. डहाणू येथे कमाल तापमान ३४.८ अंश सेल्सिअस नोंदले गेले. हे तापमान सरासरीपेक्षा ३.८ अंशांनी अधिक होते. विदर्भातही तुरळक ठिकाणी शनिवारी उष्णतेची लाट जाणवण्याचा अंदाज दिला होता. अकोला येथे राज्यात सर्वाधिक म्हणजे ४१.६ अंश सेल्सिअस, तर वर्धा येथे ४०.९, अमरावती येथे ४०.८ अंश सेल्सिअस कमाल तापमानाची नोंद झाली.

उत्तर कोकणामध्ये रविवार ते बुधवार या कालावधीत वातावरण कोरडे असू शकेल. सोमवार, १६ मार्चला सिंधुदुर्गात हलक्या सरींचा अंदाज वर्तवण्यात आला आहे. उत्तर मध्य महाराष्ट्रात जळगाव, नाशिक, अहिल्यानगर येथेही सोमवारी हलक्या सरींची शक्यता आहे, तर पुणे जिल्ह्यात रविवार ते मंगळवार या कालावधीत हलक्या सरींचा अंदाज आहे. कोल्हापूर घाट परिसर, कोल्हापूर येथे सोमवारी, सातारा, सांगली, घाट परिसर येथे रविवार, सोमवारी, सोलापूर येथे रविवार ते बुधवार या कालावधीत ‘यलो अॅलर्ट’ देण्यात आला आहे. या काळात तुरळक ठिकाणी मेघगर्जनेसह पावसाची शक्यता आहे. मराठवाड्यात बीड येथे रविवारी, सोमवारी, परभणी येथे सोमवार ते बुधवार, हिंगोली, नांदेड येथे मंगळवार आणि बुधवारी तर लातूर, धाराशिव येथे रविवारपासून मेघगर्जनेसह पाऊस पडू शकतो. मराठवाड्यात सर्वच जिल्ह्यांना या दिवसांसाठी ‘यलो अॅलर्ट’ आहे. विदर्भात चंद्रपूर, गडचिरोली या जिल्ह्यांना रविवारपासून, गोंदिया, यवतमाळला सोमवारपासून ‘यलो अॅलर्ट’ आहे, तर अकोला आणि अमरावतीमध्ये रविवारीही तुरळक ठिकाणी उष्णतेच्या लाटेची शक्यता आहे.