या अपघातात जयहरी गोविंद मालप (वय ५६), स्वरूप सुदर्शन केंद्रे (वय १३), सुमिवी सुदर्शन केंद्रे (वय ३८), घबन विठोबा देवडे (वय ५५), निशान बबन देवडे (वय २७), सुप्रिया सुनिल केंद्रे (वय ४४), पूजा सुरेश पेलकन (वय २६), कस्तुब शशिकांत लाम्बे (वय १६), सुरेश सखाराम येलकर (वय ५६), जानवी विवेक रेशीम (वय ३६), निर्मला रामदास सातगोडे (वय ५३), प्रगती हिरलेकर (वय ३५), साहील केंद्रे (वय १८) आणि शेजल केंद्रे (वय २०) यांसह एकूण १५ जण जखमी झाले. काहींना किरकोळ तर काहींना गंभीर दुखापती झाल्याची माहिती आहे. जखमींना तत्काळ उपचारासाठी जवळच्या रुग्णालयात हलविण्यात आले.

अपघातानंतर काही काळ महामार्गावर वाहतूक विस्कळीत झाली होती. स्थानिक नागरिकांनी आणि प्रवाशांनी मदतकार्य करत जखमींना बाहेर काढले. या घटनेमुळे परिसरात मोठी खळबळ उडाली असून ‘बेफाम वेगाचा कहर’ अशी प्रतिक्रिया नागरिकांतून व्यक्त होत आहे.
या प्रकरणी माणगाव पोलीस ठाणे येथे कॉ. गु. रजि. नं. ६०/२०२६ अन्वये भा.न्या.सं. कलम १२५ (अ), १२५ (ब), २८१ तसेच मोटार वाहन कायदा कलम १८४ अंतर्गत दिग्विजय पांडुरंग सुतार (रा. भुदरगड, जि. कोल्हापूर) याच्याविरुद्ध गुन्हा दाखल करण्यात आला आहे. कारचालकाने रस्त्याच्या परिस्थितीकडे दुर्लक्ष करून निष्काळजीपणे वाहन चालवल्याचा ठपका ठेवण्यात आला आहे.

मुंबई–गोवा महामार्गावर वारंवार घडणाऱ्या अपघातांमुळे सुरक्षिततेचा प्रश्न पुन्हा ऐरणीवर आला आहे. विशेषतः पंक्चर किंवा तांत्रिक बिघाडामुळे रस्त्याकडेला उभ्या वाहनांभोवती पुरेशी खबरदारी घेतली जात नसल्याचेही या घटनेतून स्पष्ट झाले. वेगमर्यादा, योग्य सिग्नलिंग आणि रात्रीच्या वेळी सुरक्षितता उपाय काटेकोरपणे राबविण्याची मागणी आता जोर धरू लागली आहे. होळीच्या आनंदमय प्रवासात घडलेल्या या दुर्घटनेने अनेक कुटुंबांवर काळी छाया पसरली असून, पुढील तपास पोलीस करीत आहेत.