आरोपीने पीएमपीच्या ॲपसारखेच बनावट ॲप दाखवून हा पास काढल्याचे लक्षात आले. त्यानंतर त्या वाहकाने वरिष्ठांना माहिती देऊन त्याबाबत पोलिसांकडे तक्रार दिली. हा तरुण शिक्षण घेत असून, त्याने काही दिवसांपूर्वी हे ॲप तयार केल्याचे समोर आले आहे. या प्रकरणी पोलिस अधिक तपास करीत आहेत.

पुणे महानगर परिवहन महामंडळाच्या (पीएमपी) अधिकृत मोबाइल ॲपसारखेच बनावट ॲप तयार करून त्याद्वारे दैनंदिन पास काढून मोफत प्रवास करताना एक तरुण गुरुवारी आढळला.

याबाबत पीएमपीचे साहेबराव बडे यांनी तक्रार दिली आहे. त्यानुसार कौस्तुभ शैलेश मांजरेकर (वय २४, रा. फ्लॅट क्र. १५, प्रीतम हाइट्स, बालाजीनगर) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, कौस्तुभ हा २६ फेब्रुवारी रोजी सकाळी सव्वादहाच्या सुमारास पीएमपी बसमधून सातारा रस्त्यावर प्रवास करीत होता. त्या वेळी त्याने पीएमपीच्या मोबाइल ॲपवरून पास काढल्याचे वाहकाला सांगितले. वाहकाने ते पाहिल्यानंतर संशय आला. त्या वेळी तो पास व ॲप बनावट असल्याचे दिसून आले. त्याने बनावट दैनंदिन पास तयार करून तो अधिकृत असल्याचा भास निर्माण केला. या खोट्या पासच्या आधारे त्याने पुणे शहरात बसने विनातिकीट/विनापास मोफत प्रवास केल्याचे समोर आले आहे. या प्रकारामुळे पीएमपी कंपनीची आर्थिक फसवणूक झाल्याची तक्रार देण्यात आली आहे.