तब्बल चार वर्षांपासून सुरु असलेला प्रशासक कार्यकाळ संपुष्टात येऊन महापौर – उपमहापौर विराजमान झाल्यानंतर शुक्रवारी ठाणे महापालिकेची सर्वसाधारण सभा झाली. याआधी प्रशासक कार्यकाळ सुरु होण्याआधी कोरोना काळातही पालिका मुख्यालयात नगरसेवकांची वर्दळ कमी झाली होती. त्यामुळे लोकप्रतिनिधींचा फारसा वावर मुख्यालयात नसल्याने अधिकारी – कर्मचारीही सुशेगात होते. मात्र नगरसेवक म्हणून निवडून आल्यानंतर काही दिवसातच महापौर – उपमहापौर निवड झाली. त्यावेळी एकत्र आलेले लोकप्रतिनिधी शुक्रवारी पुन्हा प्रथमच होणाऱ्या महासभेसाठी जमले.

आलिशान गाड्यांसह दाखल

या पार्श्वभूमीवर जुन्या नगरसेवकांसह नव्याने निवडून आलेल्या नगरसेवकही आलिशान गाड्यांसह मुख्यालयात दाखल झाले. त्यातील काही गाड्यांची किंमत दोन ते अडीच कोटींच्या घरात असून या महागड्या गाड्यांच्या शर्यतीत सत्ताधाऱ्यांसह विरोधी बाकावर बसणाऱ्या नगरसेवकही आघाडीवर होते. तर एकाच कुटुंबामधून ठाणे पालिकेवर निवडून आलेले सदस्य एकाच गाडीतून सभागृहात दाखल झालेले पाहायला मिळाले.
Maharashtra Politics : ठाकरे आणि शिंदेंची हातमिळवणी, कुठे घडला चमत्कार? दोन्ही शिवसेनांच्या युतीने राजकारणात चर्चांना उधाण

‘धर्मवीर’ चित्रपटातील प्रसंगाची आठवण

विशेष म्हणजे, पहिल्याच टर्ममध्ये लाखोंच्या गाड्या घेऊन पालिकेत एंट्री मारणाऱ्या नगरसेवकांकडे पाहून ‘धर्मवीर’ चित्रपटात स्व. आनंद दिघे नवख्या नगरसेवकाला जाब कसा विचारतात, त्या प्रसंगाची चर्चा अनेक कार्यकर्त्यांकडून दबक्या आवाजात सुरु होती. आपल्या नगरसेवकाची गाडी इतरांपेक्षा कशी भारी आहे, अशीही स्पर्धा या निमित्ताने पाहायला मिळाली.
Abhishek Kalamkar : VC करुन सारखे कपडे काढायला सांगायचा, पुण्यातील लॉजवर वारंवार अत्याचार, NCP SP पक्षातील माजी महापौरांवर गुन्हा

वाहतूक पोलिस दिमतीला

मुख्यालयाच्या आवारात महापौर व उपमहापौरपदाच्या निवडणुकीदरम्यान नगरसेवकांच्या गाड्यांच्या बेशिस्त पार्किंगपायी प्रचंड वाहतूक कोंडी झाली होती. याबाबत ‘महाराष्ट्र टाइम्स’मध्ये वृत्तही प्रसिद्ध झाले होते. या अनुषंगाने महासभेच्या निमित्ताने वाहतूक शाखेने वाहतूक पोलिस, वॉर्डन तैनात केले होते. त्यांनी नगरसेवक पालिका मुख्यालयात दाखल झाल्यानंतर संबंधित वाहनांच्या चालकांना या गाड्या मुख्य प्रवेशद्वारानजीक उभ्या न करता इतरत्र पार्क करण्याच्या सूचना दिल्या. त्यामुळे वाहतूक सुरळीत मार्गस्थ झाली.