मिळालेल्या माहितीनुसार, संग्राम धोंडीराम शिंदे सांगली जिल्ह्यातील रहिवासी असलेला हा तरुण पोलीस भरतीसाठी छत्रपती संभाजीनगरमध्ये दाखल झाला होता. शनिवारी सकाळी ८:१५ वाजेच्या सुमारास १६०० मीटर धावण्याची मैदानी चाचणी सुरू झाली. संग्रामने उत्साहात धावण्यास सुरुवात केली होती, मात्र काही अंतर पार केल्यानंतर त्याला अचानक चक्कर आली आणि तो धावपट्टीवरच कोसळला.

कुटुंबाचा आधार हरपला; शारीरिक ताण की हृदयविकार?….
संग्राम हा अत्यंत जिद्दी आणि मेहनती तरुण होता, पोलीस दलात दाखल होऊन आपल्या वृद्ध आई-वडिलांना सुख देण्याचा त्याचा निर्धार होता. त्यासाठी तो गेल्या अनेक महिन्यांपासून पहाटे उठून कठोर सराव करत होता. मात्र, नियतीच्या मनात काहीतरी वेगळंच होतं. संग्रामच्या अशा अचानक जाण्याने शिंदे कुटुंबावर दुःखाचा डोंगर कोसळला आहे. मृत्यूचे नेमके कारण अद्याप स्पष्ट झाले नसले तरी, धावताना आलेला तीव्र शारीरिक ताण किंवा हृदयविकाराचा झटका यामुळे ही घटना घडली असावी, असा प्राथमिक अंदाज वर्तवण्यात येत आहे. या घटनेचा अधिकृत तपशील आणि मृत्यूचे नेमके कारण शवविच्छेदन अहवालानंतरच समोर येईल.

उमेदवारांमध्ये भीतीचे वातावरण
या घटनेनंतर भरती प्रक्रियेत काही काळ खंड पडला होता. आपल्या डोळ्यांदेखत एका सहकाऱ्याचा मृत्यू झाल्याने मैदानावर उपस्थित असलेल्या इतर उमेदवारांमध्ये भीतीचे आणि चिंतेचे वातावरण पाहायला मिळाले. पोलीस भरतीसाठी येणाऱ्या तरुणांनी शारीरिक चाचणीपूर्वी स्वतःच्या प्रकृतीची काळजी घ्यावी आणि अतिरिक्त ताण घेऊ नये, असे आवाहन यानिमित्ताने केले जात आहे.