मिळालेल्या माहितीनुसार, दिनांक ०७ फेब्रुवारी २०२६ रोजी सकाळी साडेदहा वाजण्याच्या सुमारास म्हसळा पोलीस ठाणे हद्दीतील दिघी रोड, ता. म्हसळा येथे ही घटना घडली. या प्रकरणातील महिला फिर्यादी व पुरुष साक्षीदार हे नात्याने पत्नी-पती असून आरोपी हा फिर्यादीचा दिर आहे. साक्षीदार यांनी आरोपीला त्याच्या वडिलांना गोरेगाव येथे डॉक्टरकडे घेऊन जायचे असल्याचे सांगून, “तू गाडी कुठे घेऊन चाललास?” असे विचारले. याच कारणावरून आरोपी संतापला आणि त्याने उलट-सुलट उत्तर देत वाद सुरू केला.

वाद अधिक चिघळताच आरोपीने तेथे पडलेला लोखंडी रॉड उचलून साक्षीदार पतीवर बेदम मारहाण केली. या मारहाणीत साक्षीदाराच्या अंगावरील टी-शर्ट फाटला. पतीवर होणारी मारहाण थांबवण्यासाठी महिला फिर्यादी मध्ये गेल्या असता आरोपीने वाईट उद्देशाने त्यांच्या अंगावरील टॉप ओढला, ओढणी फाडली आणि त्यांच्या स्त्री मनास लज्जा उत्पन्न होईल असा कृत्य करत विनयभंग केला. एवढ्यावरच न थांबता आरोपीने महिलेलाही त्याच लोखंडी रॉडने मारहाण केली.

Devendra Fadnavis: ‘कायद्याने ठोकून काढू! औद्योगिक क्षेत्रातील गुंडशाही खपवून घेणार नाही’; मुख्यमंत्री देवेंद्र फडणवीस यांचा इशारा

दरम्यान आरोपीने “तुम्ही सगळे घराबाहेर निघा, नाहीतर तुम्हाला मारून टाकीन,” अशी जीवे मारण्याची धमकी देत अश्लील शिवीगाळ केली. या प्रकारामुळे परिसरात काही काळ भीतीचे वातावरण निर्माण झाले होते.

या घटनेबाबत महिला फिर्यादी यांच्या तक्रारीवरून म्हसळा पोलीस ठाण्यात गुन्हा रजिस्टर नंबर १५/२०२६ अन्वये भारतीय न्याय संहिता २०२३ मधील कलम ११८(१), ७४, ३५२, ३५१(२)(३) प्रमाणे गुन्हा दाखल करण्यात आला आहे. या प्रकरणाचा अधिक तपास पोलीस हवालदार रामचंद्र बांगर हे करत आहेत.

कौटुंबिक नात्यातील व्यक्तीकडूनच अशा प्रकारचा गंभीर अत्याचार घडल्याने नागरिकांमध्ये तीव्र संताप व्यक्त होत असून आरोपीवर कठोर कारवाईची मागणी होत आहे.