असोसिएशन फॉर इंडस्ट्रिअल डेव्हलपमेंटद्वारे (एआयडी) आयोजित अॅडव्हांटेज विदर्भ-खासदार औद्योगिक महोत्सवाचा समारोपीय सोहळ्यामध्ये केंद्रीय मंत्री नितीन गडकरी बोलत होते. व्यासपीठावर केंद्रीय एमएसएमई राज्यमंत्री शोभा करंदलाजे, राज्यमंत्री डॉ. पंकज भोयर, आमदार डॉ. आशिष देशमुख, नीती आयोगाचे सदस्य पद्मविभूषण डॉ. व्ही. के. सारस्वत, महापौर नीता ठाकरे, उपमहापौर लीला हाथीबेड, महापालिका सत्तापक्ष नेते बाल्या बोरकर, माजी मंत्री सुलेखा कुंभारे आदींची उपस्थिती होती. प्रास्ताविकपर भाषणात एआयडीचे अध्यक्ष आशिष काळे मागील तीन दिवसांमध्ये २२ विद्यार्थ्यांच्या पेटेंट्सला साडेपाच कोटींचे फंडिंग झाल्याचे सांगितले. सूत्रसंचालन आसावरी गलांडे यांनी केले. आभार एआयडीचे सचिव डॉ. विजय शर्मा यांनी मानले.

निर्यातीमध्ये एमएसएमईचे ४५ टक्के योगदान

कृषीनंतर सर्वाधिक रोजगार देणारे क्षेत्र हे एमएसएमई आहे. देशाच्या दरडोई उत्पन्नात ३१ टक्के तर निर्यातीमध्ये ४५ टक्के योगदान एमएसएमईचे आहे. ७.५ कोटी एमएसएमईंच्या माध्यमातून ३३ कोटी रोजगार निर्मिती झाली आहे, अशी माहिती केंद्रीय एमएसएमई राज्यमंत्री शोभा करंदलाजे यांनी दिली. तसेच भारतीय उद्योजकांनी निर्यातक्षम उत्पादन करत जागतिक स्पर्धेत स्वत:चे अस्तित्व निर्माण करायला हवे, असे आवाहन केले.

लेटर ऑफ इंटेंट, सामंजस्य करार व सत्कार

समारोपीय कार्यक्रमादरम्यान एड-टेक क्षेत्रात लर्न कोच आणि असोसिएशन फॉर इंडस्ट्रियल डेव्हलपमेंट अंतर्गत लर्निंग स्कूल ऑफ टेक्नॉलॉजी यांच्यात सामंजस्य करार करण्यात आला. सुनील फेरो अँड इंजिनीअरिंग प्रायव्हेट लिमिटेड विदर्भात ५ हजार कोटींची गुंतवणूक करणार असून या माध्यमातून सुमारे १,५०० प्रत्यक्ष व अप्रत्यक्ष रोजगारनिर्मिती होणार आहे, अशी माहिती देण्यात आली. तसेच आरोह हॉस्पिटॅलिटी आणि महिंद्रा सिग्नेचर यांच्यात ताडोबा आणि पेंच येथे पंचतारांकीत रिसॉर्ट उभारणीसाठी सामंजस्य करार झाला. एनएमआरडीएसोबत १,२०० कोटींची गुंतवणूक करणार असल्याबद्दल व्हीआयपीएलचे प्रशांत उगेमुगे यांचा सत्कार करण्यात आला. ग्रेटा एनर्जी लिमिटेडचे अनुप गोयल यांना २ हजार कोटी रुपयांच्या गुंतवणुकीसाठी सन्मानित करण्यात आले.

गडचिरोलीच्या विद्यार्थ्यांची ऑस्ट्रेलियाकडे झेप

गडचिरोली जिल्ह्यातील १८ विद्यार्थी मायनिंग अँड मेटलर्जी अभियांत्रिकी शिक्षणासाठी ऑस्ट्रेलियातील कर्टिन युनिव्हर्सिटी येथे रवाना होणार आहेत. केंद्रीय मंत्री नितीन गडकरी यांच्या हस्ते या विद्यार्थ्यांना बोर्डिंग पास प्रदान करण्यात आले. हा उपक्रम लॉइड मेटल्स अँड एनर्जी लिमिटेडच्या सीएसआरमधून होत आहे.