फाल्गुन बिनेन्डिज्क यांचा जन्म 10 फेब्रुवारी 1985 रोजी नागपूर मेडिकल कॉलेजमध्ये झाला. त्यावेळी त्यांची आई अवघी 21 वर्षांची आणि अविवाहित होती. सामाजिक कलंक, बदनामी आणि दबावाच्या भीतीने या तरुण मातेने केवळ तीन दिवसांच्या बाळाला नागपूरच्या मातृसेवा संघाकडे सुपूर्द केलं. त्यानंतर या बालकाला एका दाम्पत्याने दत्तक घेतलं आणि नेदरलँड्सला नेलं.

नेदरलँड्समध्ये फाल्गुन यांचं शिक्षण, करिअर आणि राजकीय वाटचाल घडत गेली. पुढे ते हीमस्टेड शहराचे महापौर झाले. मात्र, एवढं यश मिळवूनही त्यांच्या मनात जन्मदात्या आईची पोकळी कायम राहिली. हीच ओढ त्यांना पुन्हा पुन्हा भारतात, विशेषतः नागपूरमध्ये घेऊन येत आहे. याआधी 2017 आणि 2024 मध्येही फाल्गुन आईच्या शोधात भारतात आले होते. ही त्यांची तिसरी भारत भेट आहे.

नागपूरमध्ये आल्यानंतर फाल्गुन यांनी सर्वप्रथम मातृसेवा संघाच्या माजी अधीक्षक मंगला भुसारी यांची भेट घेतली. तब्बल 40 वर्षांपूर्वी याच मंगला भुसारी यांनी या अनाथ बाळाचं नाव “फाल्गुन” ठेवलं होतं आणि त्याला मायेची ऊब दिली होती. “तोच मुलगा आज परदेशात महापौर म्हणून माझ्यासमोर उभा आहे, हा क्षण शब्दात मांडणं कठीण आहे. आता त्याला त्याची आई सापडावी, हीच माझी मनापासून इच्छा आहे,” असं मंगला भुसारी भावूक होत सांगतात.

फाल्गुनच्या या भावनिक शोधाला आता प्रशासकीय पाठबळ मिळालं आहे. जिल्हाधिकारी डॉ. विपीन इटनकर यांच्या निर्देशानंतर जिल्हा बाल संरक्षण कक्ष, महिला व बालकल्याण विभाग, महापालिका आणि आरोग्य विभाग सक्रिय झाले आहेत. 40 ते 41 वर्षांपूर्वीच्या रुग्णालयातील जन्मनोंदी, दत्तक प्रक्रियेच्या फाईल्स आणि मातृसेवा संघाच्या रजिस्टरची तपासणी युद्धपातळीवर सुरू आहे. मातृसेवा संघाच्या नोंदींमध्ये फाल्गुनची अचूक जन्मतारीख आणि आईचं नाव नमूद आहे. मात्र, त्या काळात सामाजिक भीतीपोटी आईने पत्ता अपूर्ण दिल्याने शोध कठीण ठरत आहे. तरीही प्रशासन सर्वतोपरी प्रयत्न करत असून, एका परदेशी महापौराचा हा भावनिक प्रवास केवळ वैयक्तिक नाही, तर मातृत्वाच्या नात्याची अमूल्य ताकद ठरत आहे.