बीड
नेमकं काय घडलं होत ?
२५ जानेवारी रोजी सकाळी साडे नऊच्या सुमारास माजलगावचे सराफा व्यापारी अमोल पंढरीनाथ गायके हे त्यांचे पुतणे नीलेश यांच्यासह व्यापारासाठी खेर्डा गावाकडे दुचाकीवरून निघाले होते. तेव्हा गेवराई मतदार संघातील तालखेड फाट्याजवळ दबा धरून बसलेल्या तीन चोरट्यांनी त्यांची दुचाकी अडवली. व्यापाऱ्याने बॅग देण्यास विरोध केला असता, चोरट्यांनी क्रूरतेने त्यांच्या हातावर कोयत्याने वार केले आणि जीवे मारण्याची धमकी देऊन ३५० ग्रॅम सोने व ३ किलो चांदी असलेली बॅग लंपास केली. या बॅगेतील दागिन्यांची किंमत सुमारे ६० लाख रुपये होती. सुदैवाने, नीलेश गायके यांनी दुसरी बॅग घेऊन शेतात धाव घेतल्यामुळे आणखी ४० लाखांचे दागिने चोरी होण्यापासून वाचले.
संशयास्पद हालचाल आणि बीड शाहूनगर कनेक्शन
भरदिवसा झालेल्या या दरोड्यामुळे जिल्ह्यात खळबळ उडाली होती. पोलीस अधीक्षक नवनीत काँवत यांनी तातडीने तपासाचे आदेश दिले. बीड शहरातील स्थानिक गुन्हे शाखेचे पोलीस निरीक्षक शिवाजी बंटेवाड यांच्या नेतृत्वाखाली तीन पथके तयार करण्यात आली. शेकडो सीसीटीव्ही फुटेज तपासल्यानंतर पोलिसांना नारायण नावाच्या तरुणाच्या हालचाली संशयास्पद वाटल्या. त्याच्या शरीरयष्टीवरून माग काढत पोलीस बीडच्या शाहूनगर भागात पोहोचले आणि दरोड्याचा कट उघड झाला.
कर्जबाजारीपणामुळे वळला गुन्हेगारीकडे
अटक करण्यात आलेल्या मुख्य आरोपीचे नाव एकनाथ उर्फ नारायण कपाळे (वय ३५) असून तो स्वतः एक सुवर्ण कारागीर आहे. शेअर मार्केटमध्ये पैसे गुंतवल्यामुळे तो मोठ्या कर्जात बुडाला होता. हे कर्ज फेडण्यासाठी त्याने गुन्हेगारी पार्श्वभूमी असलेल्या कृष्णा निरडे आणि अभिषेक शिंदे यांना सोबत घेऊन हा कट रचला. ओळख पटू नये म्हणून आरोपींनी शहराबाहेर दुचाकींची अदलाबदल केली होती.
सापळा रुचून अटक
पोलिसांनी नारायण कपाळेसह कृष्णा निरडे आणि अभिषेक शिंदे या तिघांना जालना रोड परिसरातून सापळा रचून अटक केली. विशेष म्हणजे, कृष्णा आणि अभिषेक यांना यापूर्वी जिल्हयातून हद्दपार केलेले असतानाही त्यांनी या गुन्ह्यात सहभाग घेतला होता.
या कारवाईत स्थानिक गुन्हे शाखेच्या पथकाने अत्यंत कौशल्याने गुन्ह्याचा तपास लावला. अद्याप दोन आरोपी फरार असून पोलीस त्यांचा शोध घेत आहेत.