खोपोली शहरातील नवनिर्वाचित नगरसेविका मानसी काळोखे यांचे पती मंगेश काळोखे यांची १६ डिसेंबर रोजी निर्घृण हत्या करण्यात आली होती. सुरुवातीला वैयक्तिक वादातून हत्या झाल्याचा संशय व्यक्त केला जात होता. मात्र तपास पुढे जात असताना ही हत्या राजकीय वैमनस्यातून आणि पूर्णपणे पूर्वनियोजित कट रचून करण्यात आल्याचे स्पष्ट झाले. या घटनेनंतर रायगड जिल्ह्यातील राजकीय वातावरण चांगलेच तापले होते.

या हत्याकांडाच्या तपासात खोपोली पोलिसांनी जलद हालचाली करत मुख्य आरोपींसह काही मध्यस्थ आणि हल्लेखोरांना अटक केली होती. मात्र या संपूर्ण कटामागे सूत्रधार म्हणून राष्ट्रवादी काँग्रेसचे जिल्हाध्यक्ष सुधाकर घारे आणि पक्षाचे प्रवक्ता भरत भगत यांची नावे पुढे आली होती. हे दोघेही घटनेनंतर फरार झाले होते, त्यामुळे पोलिसांसमोर मोठे आव्हान उभे राहिले होते.

Nanded Election Result 2026: सत्तेसाठी कायपण! नांदेडच्या रणांगणात चर्चेची ठरलेल्या सासू-सुनेच्या लढतीत सासू सवाशेर, सूनबाईला किती मतांनी हरवलं?

अखेर खोपोली पोलिसांनी गोपनीय माहितीच्या आधारे खालापूर परिसरात सापळा रचून भरत भगत याला अटक केली. या अटकेमुळे तपासाला मोठी दिशा मिळाल्याचे पोलिस सूत्रांकडून सांगण्यात येत आहे. भरत भगतला पोलीस कोठडीत घेऊन त्याच्याकडून हत्येचा कट, आरोपींमधील संपर्क, आर्थिक व्यवहार आणि राजकीय हस्तक्षेप याबाबत सखोल चौकशी केली जात आहे. या चौकशीतून आणखी धक्कादायक माहिती समोर येण्याची शक्यता व्यक्त केली जात आहे.
दरम्यान, या प्रकरणातील आणखी एक मुख्य आरोपी सुधाकर घारे अद्याप फरार असून त्याचा शोध सुरू आहे.

घारे याला अटक करण्यासाठी पोलिसांनी विशेष पथके तयार केली असून रायगडसह इतर जिल्ह्यांमध्ये शोधमोहीम राबवली जात आहे. लवकरच घारे यालाही अटक केली जाईल, असा विश्वास पोलिसांनी व्यक्त केला आहे.

मंगेश काळोखे हत्या प्रकरणात राष्ट्रवादी काँग्रेसच्या पदाधिकाऱ्यांची नावे पुढे आल्याने पक्षाला मोठा राजकीय धक्का बसला आहे. या घटनेचे पडसाद आगामी स्थानिक राजकारणावरही उमटण्याची शक्यता आहे. या प्रकरणातील पुढील तपासाकडे संपूर्ण रायगड जिल्ह्याचे लक्ष लागले असून, आणखी कोणते धागेदोरे उघड होतात याची उत्सुकता वाढली आहे.