मुंबईत ६० वर्षांवरील मतदारांचीसंख्या सुमारे १५ लाख आहे. त्यात ८० वर्षांवरील मतदारांची संख्याही लक्षणीय आहे. महापालिका निवडणुकीत ८० वर्षांवरील मतदारांना घरबसल्या मतदानाची सुविधा देण्यात आलेली नाही. विधानसभा निवडणुकीदरम्यान अत्यंत वयोवृद्ध मतदारांसाठी ही सुविधा उपलब्ध करून देण्यात आली होती. मात्र, त्याच मतदारांसाठी महापालिका निवडणुकीत ही सुविधा का नाही, असा प्रश्न उपस्थित झाला.

Public Holiday: 15 जानेवारीला राज्यात सार्वजनिक सुट्टी; मात्र मतदानासाठी ‘या’ कर्मचाऱ्यांना भरपगारी रजा नाही; सुट्टीऐवजी…

दादर पश्चिम येथील रवींद्र कद्रेकर यांनी याकडे लक्ष वेधले आहे. विधानसभा निवडणुकीत त्यांच्या ९३ वर्षीय वडिलांनी घरबसल्या मतदान सुविधेचा लाभ घेतला होता. मात्र, यंदा तीच सुविधा उपलब्ध नसल्याने अनेक ज्येष्ठ नागरिक मतदानापासून वंचित राहण्याची शक्यता असल्याचे त्यांनी सांगितले. चुरशीच्या निवडणुकीत प्रत्येक मत महत्त्वाचे असून, ज्येष्ठ नागरिकांची मते निर्णायक ठरण्याची शक्यता असताना या मुद्द्यावर निवडणूक आयोगाकडे फारसा पाठपुरावा झालेला नसल्याची खंत त्यांनी व्यक्त केली.

‘हा मतदारवर्ग कोणत्याही परिस्थितीत मतदानाचा हक्क बजावतो. मात्र, यंदा या वर्गाकडे दुर्लक्ष होत असल्याचे चित्र दिसत असल्याचे ‘सिल्व्हर इनिंग्स’ संस्थेचे संस्थापक अध्यक्ष शैलेश मिश्रा यांनी सांगितले. घरबसल्या मतदानाची सुविधा नसल्यामुळे अनेक ज्येष्ठ नागरिक मतदानापासून वंचित राहू शकतात. याचा थेट परिणाम मतदानाच्या टक्केवारीवर होण्याची भीती त्यांनी व्यक्त केली. महाराष्ट्र ज्येष्ठ नागरिक संघाच्या मुंबई प्रादेशिक विभागाचे सल्लागार विजय औंधे यांनीही नाराजी व्यक्त केली. आम्ही अनेक ठिकाणी याबाबत पाठपुरावा केला.

ज्येष्ठ नागरिकांच्या अपेक्षा आणि मागण्या मांडल्या, मात्र अद्याप कोणताही ठोस प्रतिसाद मिळालेला नाही, असे त्यांनी सांगितले. तरीही मतदान हा आमचा हक्क आणि कर्तव्य असल्याने आम्ही मतदान करणारच आहोत. निवडून आल्यानंतर मात्र उमेदवारांसमोर आमचे प्रश्न नक्की मांडणार, अशी भूमिका त्यांनी स्पष्ट केली.