पुणे: वादग्रस्त ठरलेल्या माजी प्रशिक्षणार्थी आयएएस अधिकारी पूजा खेडकर यांच्या बाणेर येथील निवासस्थानी शनिवारी रात्री एक खळबळजनक प्रकार घडला. त्यांच्याच घरी कामाला असलेल्या एका नोकराने पूजा यांच्या आई-वडिलांना अन्नातून गुंगीचे औषध देऊन बेशुद्ध केले आणि सर्वांचे मोबाईल घेऊन पळ काढला. या घटनेमुळे शहरात मोठी खळबळ उडाली असून चतुःश्रृंगी पोलीस या प्रकरणाचा तपास करत आहेत.
मिळालेल्या माहितीनुसार, संबंधित संशयित कामगार अवघ्या आठ दिवसांपूर्वीच नेपाळवरून खेडकर यांच्या घरी कामासाठी आला होता. शनिवारी रात्री त्याने दिलीप खेडकर आणि मनोरमा खेडकर यांना गुंगीचे औषध दिले, ज्यामुळे ते बेशुद्ध पडले. त्यानंतर आरोपीने पूजा खेडकर यांनाही एका ठिकाणी बांधून ठेवले आणि घरातील सर्वांचे मोबाईल फोन गोळा करून तिथून पळ काढला. या अनपेक्षित प्रकारानंतर पूजा खेडकर यांनी कशीबशी स्वतःची सुटका करून घेतली आणि तातडीने पोलिसांशी संपर्क साधला.
घटनेची माहिती मिळताच चतुःश्रृंगी पोलिसांनी खेडकर यांच्या बंगल्यावर धाव घेतली. यावेळी दिलीप आणि मनोरमा खेडकर हे दोघेही निपचित पडलेले आढळले, त्यांना तातडीने खासगी रुग्णालयात दाखल करण्यात आले. सुदैवाने, आता त्यांची प्रकृती स्थिर असून ते धोक्याबाहेर असल्याचे डॉक्टरांनी सांगितले आहे. पूजा खेडकर यांनी पोलिसांना प्राथमिक माहिती दिली असून, मानसिक धक्का बसल्यामुळे त्या काही वेळाने लेखी तक्रार देणार आहेत.
दरम्यान, पूजा खेडकर यांच्या घरातून मोबाईल व्यतिरिक्त नेमके काय चोरीला गेले, याचा तपशील अद्याप समोर आलेला नसून पोलीस संशयित आरोपीचा शोध घेत आहेत.