ठाण्यातील प्रचारात शिवसेना-भाजपने आघाडी घेतली आहे. उपमुख्यमंत्री एकनाथ शिंदे यांनी रोड शोच्या माध्यमातून युतीच्या उमेदवारांचा प्रचार ठाण्यात केला. मुख्यमंत्री देवेंद्र फडणवीस यांनीही गडकरी रंगायतन नाट्यगृहात मुलाखतीतून निवडणुकीच्या पार्श्वभूमीवर ध्येयधोरणे स्पष्ट केली. प्रचाराचा ज्वर चढलेला असतानाच, आता गुरुवारी राज ठाकरे शाखांना ठाण्यात भेटी देणार असून चंदनवाडी, शिवाईनगर, मनोरमा नगर येथील शाखांमध्ये हजेरी लावणार आहेत, असे ठाणे व पालघर जिल्हाध्यक्ष अविनाश जाधव यांनी सांगितले.

सर्वात मोठी बातमी! मुंबईत शिवसेनेच्या उमेदवारावर जीवघेणा हल्ला, वांद्र्याच्या ज्ञानेश्वर नगरात घातपाताची घटना

युतीनंतर प्रथमच ठाण्यात

ठाकरे बंधूंच्या युतीनंतर प्रथमच राज ठाकरे ठाण्यात येणार असून याआधी त्यांनी मनसेसाठी शहरात स्वतंत्र प्रचारसभा घेतल्या आहेत. लोकसभा निवडणुकीवेळी कळवा येथे त्यांनी प्रचार सभा घेतली होती. मात्र यंदा प्रथमच ठाकरे बंधूंच्या एकत्रित प्रचारासाठी राज मैदानात उतरणार आहेत. उपमुख्यमंत्री एकनाथ शिंदे यांचा बालेकिल्ला असलेल्या या शहरात राज कोणाचा ‘ठाकरी’ भाषेत समाचार घेतात, याकडे लक्ष आहे.

२४ तासांत घरवापसी

मिरा-भाईंदरमधील भाजपच्या माजी नगरसेविका अनिता मुखर्जी यांनी २४ तासांत घरवापसी केली आहे. भाजपने उमेदवारी नाकारल्यामुळे नाराज असलेल्या मुखर्जी यांनी मंगळवारी परिवहनमंत्री प्रताप सरनाईक यांच्या उपस्थितीत शिवसेनेत प्रवेश केला होता. बुधवारी त्या पुन्हा भाजपमध्ये परतल्या.

मिरा-भाईंदर महापालिकेच्या प्रभाग १३ मधून मुखर्जी नगरसेवक होत्या. या महापालिका निवडणुकीत शेवटच्या क्षणी त्यांचे तिकीट कापण्यात आले. त्यांच्या जागी प्रीती जैन यांना संधी देण्यात आली. यामुळे गेल्या काही दिवसांपासून मुखर्जी नाराज असल्याची चर्चा होती. याच नाराजीतून त्यांनी मंगळवारी प्रताप सरनाईक यांच्या उपस्थितीत शिवसेनेत प्रवेश केला होता.