अकोला: अकोला जिल्ह्यातील काँग्रेसचे ज्येष्ठ नेते आणि महाराष्ट्र प्रदेश काँग्रेसचे उपाध्यक्ष हिदायत पटेल यांच्यावर अकोट तालुक्यातील माहोळ गावात अज्ञात हल्लेखोरांनी धारदार शस्त्रांनी प्राणघातक हल्ला केला. या हल्ल्यात ते गंभीर जखमी झाले असून त्यांची प्रकृती चिंताजनक आहे. पोटात आणि मानेवर खोलवर जखमा झाल्याने त्यांना तातडीने अकोट येथील रुग्णालयात नेण्यात आले, मात्र अधिक रक्तस्राव आणि जखमांचे गांभीर्य लक्षात घेता त्यांना अकोला येथील मोठ्या रुग्णालयात हलवण्यात आले आहे. या हल्ल्यामागे राजकीय वैमनस्याची किनार असण्याची शक्यता वर्तवली जात आहे.
हिदायत पटेल यांच्यावर आज अकोट तालुक्यातील माहोळ गावात हा हल्ला झाला. काही हल्लेखोरांनी त्यांना घेरले आणि धारदार शस्त्रांनी त्यांच्यावर सपासप वार केले. या हल्ल्यात पटेल यांच्या पोटावर आणि मानेवर खोलवर जखमा झाल्या आहेत. भरदिवसा झालेल्या या हल्ल्यामुळे परिसरात मोठी पळापळ झाली.
रक्ताच्या थारोळ्यात पडलेल्या पटेल यांना तातडीने अकोट येथील रुग्णालयात नेण्यात आले. मात्र, अतिरक्तस्राव आणि जखमांचे गांभीर्य लक्षात घेता, प्राथमिक उपचार करून त्यांना तातडीने अकोला येथील मोठ्या रुग्णालयात हलवण्यात आले आहे. त्यांची प्रकृती अत्यंत चिंताजनक असल्याचे सांगण्यात येत आहे.
हिदायत पटेल यांच्यावर हल्ला झाल्याचे वृत्त वाऱ्यासारखे पसरताच अकोला आणि अकोटमधील काँग्रेस कार्यकर्त्यांनी मोठ्या संख्येने रुग्णालयाबाहेर गर्दी केली. कार्यकर्त्यांमधील संताप पाहता आणि कायदा-सुव्यवस्थेचा प्रश्न निर्माण होऊ नये म्हणून पोलिसांनी अकोला शहरासह माहोळ गावात कडक पोलीस बंदोबस्त तैनात केला आहे.
Santosh Dhuri: मनसेचं सरेंडर, मातोश्रीतील डील अन्…; संतोष धुरींनी भाजपमध्ये जाताच सगळंच काढलं!
आरोपींचा शोध घेण्यासाठी पोलिसांची विविध पथके रवाना करण्यात आली आहेत. हा हल्ला कोणी आणि का केला, याचा तपास युद्धपातळीवर सुरू आहे. लवकरच गुन्हेगारांना अटक केली जाईल,” असे पोलीस प्रशासनाकडून सांगण्यात आले आहे.
राज्यात सध्या महानगरपालिका निवडणुकांचे पडघम वाजत असतानाच हा हल्ला झाल्याने राजकीय वर्तुळात उलटसुलट चर्चांना उधाण आले आहे. नुकत्याच झालेल्या नगरपालिका निवडणुकीत अकोट नगरपालिकेच्या काँग्रेस नगराध्यक्ष उमेदवार अलका बोडके यांनी हिदायत पटेल यांच्यावर पक्षाविरोधी भूमिका घेतल्याचा जाहीर आरोप केला होता. या सर्व पार्श्वभूमीवर, हा हल्ला राजकीय वादातूनच झाला असावा, असा कयास पोलिसांनी वर्तवला आहे.
हिदायत पटेल हे महाराष्ट्र प्रदेश काँग्रेसचे उपाध्यक्ष आणि अकोला जिल्ह्यातील ज्येष्ठ नेते आहेत. त्यांनी २०१४ आणि २०१९ च्या लोकसभा निवडणुकीत काँग्रेसचे उमेदवार म्हणून निवडणूक लढवली होती. अकोला जिल्ह्यातील काँग्रेसचा एक आक्रमक आणि महत्त्वाचा चेहरा म्हणून हिदायत पटेल यांची ओळख आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा