नांदेड महानगरपालिका निवडणुकीत भाजपकडून एकाच कुटुंबातील पती-पत्नीला थेट निवडणुकीच्या रिंगणात उतरवण्यात आलं आहे. विशेष म्हणजे हे दोघेही यापूर्वी माजी महापौर आणि माजी सभापती म्हणून पदं भूषवलेले असून माजी मुख्यमंत्री अशोक चव्हाण यांचे विश्वासू म्हणून त्यांची ओळख आहे. दरम्यान भाजपने एकाच कुटुंबातील दोघांना उमेदवारी दिल्याने या घराणेशाहीची राजकीय वर्तुळात चर्चा रंगली आहे.
Eknath Shinde : आम्ही विश्वास ठेवला, पण भाजपने विश्वासघात केला, महायुती तुटली, आता थेट लढत… शिंदेंच्या मंत्र्याची मोठी माहिती
भाजपने किशोर स्वामी यांना प्रभाग क्रमांक 9 आणि त्यांच्या पत्नी शैलेजा स्वामी यांना प्रभाग क्रमांक 4 मधून उमेदवारी दिली आहे. 2017 च्या निवडणुकीत काँग्रेसकडून दोघांना तिकीट देण्यात आलं होतं आणि दोघांनी विजय मिळवला. किशोर स्वामी हे यापूर्वी स्थायी समितीचे सभापती होते, तर त्यांच्या पत्नीला महापौरची संधी देण्यात आली होती.

माजी मुख्यमंत्री अशोक चव्हाण यांचे ते अत्यंत विश्वासू मानले जातात. अशोक चव्हाण यांनी भाजपमध्ये प्रवेश केल्यानंतर या दाम्पत्यानी देखील भाजपात प्रवेश केला होता. विधानसभा निवडणुकीत अशोक चव्हाण यांच्या कन्या श्रीजया चव्हाण यांच्या प्रचारासाठी भोकर मतदारसंघात तळ ठोकून होते, शिवाय किशोर स्वामी यांना भोकर नगरपरिषदेची जवाबदारी देण्यात आली होती. या निवडणुकीत भाजपने एकहाती सत्ता मिळवली. एकीकडे अशोक चव्हाण यांनी काँग्रेस सोडून भाजपात आलेल्या अनेक दिग्गजांचा पत्ता कट केला आहे. मात्र किशोर स्वामी आणि शैलेजा स्वामी यांना चव्हाण यांनी पुन्हा संधी दिली आहे.

भाजपकडून वारंवार घराणेशाहीला विरोध केल्याचे जाहीर केलं जातं. मात्र प्रत्यक्षात उमेदवारी देताना मात्र याच घराणेशाहीचा अवलंब होत असल्याचा आरोप विरोधकांकडून केला जात आहे. लोहा नगरपरिषदेत भाजपकडून एकाच कुटुंबातील सहा जणांना उमेदवारी देण्यात आली होती, मात्र सर्वांचा पराभव झाला. दरम्यान, स्थानिक पातळीवर भाजपच्या या निर्णयामुळे पक्षांतर्गत नाराजी वाढत असल्याचीही चर्चा असून, सर्वसामान्य कार्यकर्त्यांमध्ये अस्वस्थता निर्माण झाल्याचं चित्र पहायला मिळत आहे. आगामी निवडणुकीत या घराणेशाहीचा भाजपला फटका बसतो का, हे निकालातून स्पष्ट होणार आहे.