जागावाटपावरून रस्सीखेच, आकड्यांवरच अडलं घोडं

वरिष्ठ नेत्यांनी महायुती म्हणून निवडणूक लढवण्याचे स्पष्ट निर्देश दिल्यानंतर स्थानिक पातळीवर बैठका झाल्या. मात्र प्रत्यक्षात जागा वाटपावरून मोठा तिढा निर्माण झाला आहे. राष्ट्रवादी (अजित पवार गट) 32 जागांचा प्रस्ताव ठेवला आहे. तसंच भाजप 30 जागांचा आणि शिंदे गटाने आपल्या विद्यमान 24 जागांचा दावा केला आहे. या आकड्यांवर अद्याप एकमत झालेलं नाही. त्यातच काही ठराविक प्रभागांवरून वाद अधिक तीव्र झाला आहे.

प्रभागांवरून वाद पेटला

शहरातील प्रभाग क्रमांक 9, 12, 15 आणि काही प्रमाणात 16 या प्रभागांमध्ये शिंदेसेनेचं प्राबल्य असल्याचा दावा आहे. मात्र याच प्रभागांतून भाजप आणि राष्ट्रवादीकडूनही इच्छुकांची रांग लागली आहे. या जागा कोणत्याही परिस्थितीत सोडायच्या नाहीत, अशी ठाम भूमिका शिंदेसेनेने घेतली आहे. याबाबत स्थानिक शिंदेसेना नेत्यांनी थेट एकनाथ शिंदे यांची भेट घेऊन आपली भूमिका स्पष्ट केली आहे.

फडणवीसांच्या उपस्थितीत बैठक, पण शिंदेंशी चर्चा नाही

भाजपकडून देवेंद्र फडणवीस यांच्या उपस्थितीत मुंबईत जागा वाटपाबाबत बैठक झाली. भाजप आणि राष्ट्रवादीची एकत्रित चर्चा झाली, मात्र उपमुख्यमंत्री एकनाथ शिंदे यांच्याशी थेट चर्चा न झाल्याने राजकीय वर्तुळात आश्चर्य व्यक्त होत आहे. भाजपकडून शिंदेसेनेच्या स्थानिक नेत्यांशी चर्चा करून आज घोषणा करण्याचे संकेत देण्यात आले आहेत. मात्र थेट शिंदेंशी चर्चा न होता प्रश्न सुटणार का? हा सवाल आता ऐरणीवर आला आहे. त्यामुळे महायुतीची चर्चा आणखी लांबण्याची चिन्हं स्पष्ट दिसत आहेत.
Jyotirlinga Darshan : ज्योतिर्लिंग दर्शनाला जाताय? 12 ज्योतिर्लिंगांपैकी एक असलेल्या शिवलिंगाचं गाभाऱ्यातील दर्शन बंद, प्रशासनाचा निर्णय

सन्मानजनक वाटप न झाल्यास शिंदेसेना वेगळ्या वाटेवर?

महायुतीत जागा वाटपावरून ओढाताण शिगेला पोहोचली आहे. सन्मानजनक जागा न मिळाल्यास शिंदेसेना वेगळा निर्णय घेऊ शकते, अशी जोरदार चर्चा राजकीय वर्तुळात सुरू आहे.

महाविकास आघाडीची संपूर्ण जबाबदारी खासदार निलेश लंकेंकडे

महायुती असो वा महाविकास आघाडी, दोन्ही आघाड्यांनी अद्याप एकाही उमेदवाराची अधिकृत यादी जाहीर केलेली नाही. महाविकास आघाडीवर शिक्कामोर्तब झाला असला तरी, जागा वाटपाचा तिढा येथेही कायम आहे. संपूर्ण जबाबदारी खासदार निलेश लंके यांच्याकडे देण्यात आली आहे. मात्र जागावाटप रखडल्याने महाविकास आघाडीतील इच्छुकांमध्येही मोठा संभ्रम निर्माण झाला आहे.

आपची आघाडी, AIMIM मैदानात

राजकीय गोंधळातच आम आदमी पार्टीने (AAP) महापालिकेसाठी 10 उमेदवारांची पहिली यादी जाहीर करून सर्वांना धक्का दिला आहे. त्यामुळे AAP पहिल्यांदाच अहिल्यानगर महापालिका निवडणुकीच्या रिंगणात उतरली आहे. दरम्यान, AIMIM नेही आपली ताकद दाखवली आहे. AIMIM चे महाराष्ट्र प्रदेशाध्यक्ष, खासदार इम्तियाज जलील यांनी पत्रकाद्वारे पहिली उमेदवार यादी जाहीर केली आहे.