नेमकी घटना काय?

मिळालेल्या माहितीनुसार, जेऊर परिसरात गेल्या काही दिवसांपासून एका शेतजमिनीवरून दोन गटांत वाद सुरू होता. शनिवारी सकाळी १० वाजेच्या सुमारास हा वाद पुन्हा उफाळून आला. दोन्ही गटातील लोक लाठ्या-काठ्यांसह आमनेसामने आले आणि एकमेकांवर दगडफेक सुरू केली. दरम्यान, या वादात मध्यस्थी करण्यासाठी गेलेले बाजार समितीचे संचालक मधुकर मगर हेदेखील दगडफेकीचा शिकार झाले. त्यांच्या डोक्याला लागल्याची माहिती असून त्यांना तातडीने उपचारासाठी रुग्णालयात दाखल करण्यात आले आहे.

Sanjay Khodke Accident : अमरावतीत आमदार संजय खोडके यांचा भीषण अपघात, घटना सीसीटीव्हीत कैद, धक्कादायक व्हिडीओ समोर

आठवडी बाजारामुळे भीतीचे वातावरण

योगायोगाने शनिवारी जेऊरचा आठवडी बाजार असल्याने तिथे मोठी गर्दी होती. भरवस्तीत आणि बाजारच्या दिवशीच ही दगडफेक झाल्याने व्यापाऱ्यांची आणि ग्राहकांची मोठी पळापळ झाली. यापूर्वी ग्रामदैवताच्या यात्रेदरम्यानही अशाच प्रकारची हिंसक घटना घडली होती, त्यामुळे ग्रामस्थांमध्ये भीतीचे वातावरण आहे.

पोलिसांचा मोठा बंदोबस्त

घटनेची माहिती मिळताच एमआयडीसी पोलीस ठाण्याचे सहाय्यक पोलीस निरीक्षक माणिक चौधरी यांनी फौजफाट्यासह घटनास्थळी धाव घेतली. पोलीस उपनिरीक्षक मनोज मोंढे यांच्या मार्गदर्शनाखाली गावात सध्या शांतता असली तरी तणाव कायम आहे. भाजप युवा मोर्चाचे जिल्हाध्यक्ष अक्षय कर्डिले यांनी जखमींची आणि घटनास्थळाची पाहणी केली.

गुन्हा दाखल करण्याची प्रक्रिया सुरू

या प्रकरणी पोलिसांनी दोन्ही गटातील संशयितांना ताब्यात घेण्याची प्रक्रिया सुरू केली असून दुपारपर्यंत एमआयडीसी पोलीस ठाण्यात गुन्हा दाखल करण्याचे काम सुरू होते. कोणीही अफवांवर विश्वास ठेवू नये आणि शांतता राखावी, असे आवाहन प्रशासनाकडून करण्यात आले आहे. जमिनीचा हा जुना वाद आता हिंसक वळणावर गेल्याने जेऊरमधील राजकीय आणि सामाजिक वातावरण चांगलेच तापले आहे.