18 महिन्यांपूर्वी बांधकाम पूर्ण

190 कोटी रुपये खर्चून उभारलेला हा 21 मजली वाशी बस डेपो प्रत्यक्षात 18 महिन्यांपूर्वीच पूर्ण झाला होता. मात्र विविध कारणांमुळे तो वापरात येऊ शकला नव्हता. अखेर सोमवार संध्याकाळपासून हा डेपो कार्यान्वित करण्यात आला आहे. या दीर्घ विलंबाच्या काळात जुने बस स्थानक पाडण्यात आले होते. त्यामुळे प्रवाशांना वाशी–कोपर खैरणे या वर्दळीच्या मुख्य रस्त्यावरूनच बस पकडाव्या लागत होत्या. यामुळे वाहतुकीचा धोका, तसेच ऊन-पावसाचा त्रास प्रवाशांना सहन करावा लागत होता.Navi Mumbai News: नवी मुंबईकरांसाठी रेल्वेकडून आणखी एक गिफ्ट! 10 वाढीव लोकल फेऱ्या सुरू; कुठे आणि कसे असेल वेळापत्रक?

अधिकाऱ्यांनी दिलेल्या माहितीनुसार, मुंबई, पनवेल आणि वाशी रेल्वे स्थानकाच्या दिशेने जाणाऱ्या बसेस या नव्या वाशी बस डेपोमध्ये थांबतील. मात्र ठाणे आणि घनसोलीकडून येणाऱ्या बसेस विश्णुदास भावे प्रेक्षागृहाच्या दिशेने वळवण्यात येणार असून, त्या बसेसना वाशी बस डेपोमध्ये प्रवेश दिला जाणार नाही.

या प्रकल्पाची सुरुवात 2018 साली 140 कोटी रुपयांच्या अंदाजपत्रकासह झाली होती. मात्र कालांतराने खर्च वाढत गेला आणि अंतिम खर्च 190 कोटी रुपयांवर पोहोचला. वाशी येथील जुन्या बस डेपोच्या जागेवर उभारण्यात आलेल्या या 21 मजली इमारतीसाठी तीन वेळा पूर्णत्वाच्या मुदती वाढवाव्या लागल्या. ऑक्टोबर 2019 मध्ये हा बस डेपो पूर्णपणे बंद करण्यात आला होता.

वैशिष्ट्ये काय?

या भव्य इमारतीत खालचा पाच मजली भाग आणि वरचा 16 मजली भाग आहे. एकूण जागेपैकी सुमारे 75 टक्के क्षेत्र बस वाहतुकीसाठी राखीव ठेवण्यात आले आहे. उर्वरित व्यावसायिक भागात रेस्टॉरंट, बँक्वेट हॉल तसेच कार्यालयांसाठी जागा उपलब्ध करून देण्यात आली आहे. आधुनिक रचनेचा आणि बहुपयोगी सुविधांनी सुसज्ज असा हा वाशी बस डेपो नवी मुंबईच्या सार्वजनिक वाहतुकीत एक महत्त्वाचा टप्पा ठरणार आहे.