वायू प्रदूषण नियंत्रणासाठी १५ ऑक्टोबर २०२४ रोजी महापालिकेने २८ मुद्द्यांचा समावेश असलेली सर्वंकष मार्गदर्शक तत्त्वे जारी केली होती. या मार्गदर्शक तत्त्वांचे काटकोरपणे पालन व्हावे, यासाठी महापालिकेकडून सर्व वॉर्ड स्तरावर ९४ भरारी पथकांची नियुक्ती करण्यात आली. या पथकांकडून खासगी प्रकल्पांसह रस्ते, मेट्रो आदी शासकीय प्रकल्पांची पाहणी करत मार्गदर्शक तत्त्वांचे उल्लंघन
करणाऱ्यांना नोटीस बजावल्या जात आहेत. बांधकाम स्थळी संवेदक (सेन्सॉर) आधारित वायू गुणवत्ता निर्देशांक (एक्यूआय) मोजणारे संयंत्र कार्यान्वित राहतील, याची पाहणीही केली जाते.

Delhi Air Pollution: मोठी बातमी! दिल्लीत आजपासून ‘या’ वाहनांना इंधनबंदी; सरकारचा नवा नियम

अनेक बांधकामस्थळी मार्गदर्शक तत्त्वांच्या अंमलबजावणीची सात दिवसांची नोटीस बजावल्यानंतरही त्याची अंमलबजावणी होत नाही. त्यामुळे महापालिका पर्यावरण विभागाकडून काम बंद करण्याची नोटीस बजावली जाते. यासंदर्भात अलीकडेच नियुक्त झालेले महापालिका अतिरिक्त आयुक्त डॉ. अविनाश ढाकणे यांनी मार्गदर्शक तत्त्वांची अंमलबजावणी न करणाऱ्या खासगी किंवा सरकारी यंत्रणांना बांधकामाच्या ठिकाणी पालन न केल्यास जबर दंड आकारला जाईल, असे स्पष्ट केले होते.

दंड आकारणी कशी ?

नियमांचे उल्लंघन करणाऱ्यांस सध्या १० हजार रुपये दंड आकारणी होते. त्यानंतरही अंमलबजावणीसाठी सात दिवसांची मुदत दिली जाते आणि तरीही मार्गदर्शक तत्त्वांची अंमलबजावणी न केल्यास ५० हजार रुपये दंड आकारला जातो. मात्र, हा दंड आकारणी करूनही पालन न केल्यास अंतिमतः एक लाख रुपये दंड आकारण्यात येणार असल्याचे सूत्रांनी सांगितले. याशिवाय १० हजार रुपये दंड आकारणीआधी सात दिवसांची मुदत दिली जाते. या मुदतीतही अंमलबजावणी न केल्यास प्रतिदिन पाच हजार रुपये दंड आकारणीचा विचार महापालिका करत आहे.

१५ दिवसांत ३५३ ठिकाणी कारणे दाखवा नोटीस

प्रदूषण नियंत्रणासाठी मुंबई महापालिकेकडून करण्यात येत असलेल्या उपायांमध्ये पाण्याच्या टँकरद्वारे डीप क्लिनिंग, रस्ते स्वच्छ करणे, मिस्टिंग मशीनद्वारे फवारणी करणे यासह योग्य उपाय न करणाऱ्या बांधकामांना कारणे दाखवा नोटीस बजावणे, कार्यस्थगिती आदेश दिले जात आहेत. १ ते १६ डिसेंबरदरम्यान ३७६ ठिकाणी पाण्याच्या टँकरद्वारे रस्ते स्वच्छ करण्यासह डीप क्लिनिंग करण्यात आले.