अधिवेशनाच्या पहिल्या दिवसापासून विरोधी पक्षनेतेपदासाठी वेगवेगळी नावे पुढे येत आहेत. आदित्य ठाकरे, भास्कर जाधव यांची नाव पुढे आली होती. त्यानंतर आज, मंगळवारी विजय वडेट्टीवारांच्या नावाची चर्चा सुरू आहे. याबाबत त्यांना विचारले असता ते म्हणाले, ‘महाविकास आघाडीच्या नेत्यांनी शिवसेनेचे भास्कर जाधव आणि काँग्रेसचे सतेज पाटील यांच्या नावाची शिफारस केली होती. दोन महिन्यांपूर्वी मुख्यमंत्र्यांशी भेटून विरोधी पक्षनेतेपद द्या, अशी मागणी करण्यात आली होती. मात्र, माझ्या नावासंदर्भात कुणीही माझ्याशी चर्चा केलेली नाही. त्यामुळे माझे नाव पुढे कसे आले, याचा शोध घ्यावा लागेल.’ तसेच भाजपला वडेट्टीवार विरोधी पक्षनेते म्हणून चालतात यासंदर्भात याबाबत मला मुख्यमंत्र्यांनाच विचारावे लागेल, असे देखील ते म्हणाले.

सरकारने प्रकरणाची चौकशी करावी

शिवसेनेचे ज्येष्ठ नेते अंबादास दानवे यांनी एक्सवर व्हिडीओ पोस्ट केला आहे. त्यात एक आमदार पैशांच्या गड्ड्यांसह दिसत असून तो आमदार कोण, असा सवाल दानवे यांनी केला आहे. याबाबत बोलताना वडेट्टीवार यांनी सरकारने संपूर्ण प्रकरणाची चौकशी करावी, अशी मागणी केली.

आरोप करताच फाशी देणार का?

शिवसेनेला टार्गेट केले जात आहे, असे म्हणणे चुकीचे होईल. बॅगांमध्ये पैसे सापडले, असे आरोप होत असतात. कुणी आरोप केला की लगेच फाशी द्यायची, असे होत नाही. चौकशीमध्ये सर्व सिद्ध होईल. कावळाच्या शापाने गाय मरत नाही. अंबादास दानवे सुशिक्षित बेरोजगार राजकारणी आहे, असे पाणीपुरवठा मंत्री गुलाब पाटील म्हणाले.