अल्पवयीन मुलीची छेडछाड केल्याप्रकरणी भोर पोलीस ठाण्यात एक तक्रार आली होती. याप्रकरणी भोर वाघजाई नगर मधील मयूर खुंटे या युवकाला मंगळवारी बोलावण्यात आले होते. यावेळी त्याला पोलिसांकडून समज देण्यात आली. दुसऱ्याच दिवशी बुधवारी या युवकाने सायंकाळी चार वाजण्याच्या दरम्यान आत्महत्या केली. याप्रकरणी पोलिसांना जबाबदार धरीत संबंधित पोलीस उपनिरीक्षकास निलंबित करावे यासाठी नातेवाईक आणि आंबेडकरी चळवळीतील कार्यकर्ते आक्रमक झाले होते.
Sharad Pawar: कामावर मत मागा,पैशावर नव्हे; निधीसंबंधी वक्तव्यांवर शरद पवारांचा सत्ताधाऱ्यांना चिमटा
घटनेनंतर संतप्त कुटुंबीयांनी संबंधित अधिकाऱ्याविरुद्ध कठोर कारवाई होईपर्यंत मृतदेह ताब्यात घेण्यास नकार दिला. उपविभागीय अधिकारी राजेंद्रसिंग गौर यांनी प्राथमिक पातळीवर संशयित अधिकाऱ्याची बदली केल्याचे जाहीर केले, मात्र नातेवाईकांचा संताप काही त्याने कमी झाला नाही. गुरुवारी सकाळी दलित संघटनांसह कुटुंबीयांनी रामबाग परिसरात जवळपास सहा तास रास्ता रोको करत आंदोलन छेडले. यामुळे भोर-महाड, भोर-मांढरदेवी, भोर-आंबवडे आणि भोर-शिरवळ या प्रमुख मार्गांवरील वाहतूक पूर्णपणे ठप्प झाली होती.
पालकमंत्री म्हणून माझी मलाच लाज वाटली; पुण्यातल्या सभेत अजित पवारांचा संताप, असं का म्हणाले?
दरम्यान, वाढत्या तणावाच्या पार्श्वभूमीवर पुणे ग्रामीणचे पोलिस अधीक्षक संदीपसिंग गिल यांनी गुरुवारी दुपारनंतर भोर येथे पोहोचून आंदोलनकर्त्यांशी प्रत्यक्ष चर्चा केली. संबंधित अधिकाऱ्याची बदली करण्यात आली असून चौकशी वेगाने सुरू असल्याचे त्यांनी कुटुंबीयांसमोर स्पष्ट केले. शवविच्छेदनाच्या निष्कर्षानुसार अधिकारी दोषी ठरल्यास त्याच्यावर प्रशासकीय आणि कायदेशीर पातळीवर कठोर कारवाई होईल, असे आश्वासनही त्यांनी दिले. या हमीनंतर कुटुंबीयांनी मृतदेहाचे पंचनामा व शवविच्छेदन करण्यास अखेर होकार दिला. जवळपास 24 तास सुरू असलेला तणाव यानंतर ओसरू लागला असून भोर शहरातील परिस्थिती हळूहळू पूर्ववत होत आहे.