मुंबई महापालिकेत पाच वेळा नगरसेवक राहिलेल्या रवी राजा यांना काँग्रेसकडून शीव कोळीवाडा मतदारसंघातून विधानसभा निवडणूक लढवण्याची इच्छा होती. रवी राजा यांनी अनेकदा आपली नाराजी बोलून दाखवली होती. अखेर उमेदवारी न मिळाल्याने काँग्रेसला रामराम करून त्यांनी ऑक्टोबर २०२४ मध्ये भाजपमध्ये प्रवेश केला. राजा हे महापालिकेत विरोधी पक्षनेतेही राहिले होते. त्यांच्यावर भाजपने उपाध्यक्षाची जबाबदारी दिली.

महापालिका निवडणुकीसाठी रवी राजा यांनी जय्यत तयारी केली. मात्र त्यांचा प्रभाग १७६ ‘ओबीसी महिला’साठी आरक्षित झाला. त्यामुळे अन्य प्रभागांतून लढण्यासाठी त्यांनी चाचपणी सुरू केली. मात्र त्यांचा प्रभाग येत असलेल्या एफ उत्तर वॉर्डमध्ये दहापैकी आठ प्रभाग हे महिलांसाठी आरक्षित झाले आहेत.
Uddhav Thackeray : निवडणुकीत आपण शिंदेंशी युती करुया, ठाकरेंच्या बड्या नेत्याचा प्रस्ताव, उद्धव प्रचंड चिडले, जे बजावलं होतं..
प्रभाग क्र. १७८ हा खुला असून ओबीसी महिला आरक्षित असलेला प्रभाग क्र. १८१ हा खुला झाला आहे. या प्रभागातून गेल्या निवडणुकीत पुष्पा कोळी निवडून आल्या होत्या. त्या शिवसेना शिंदे गटात आहेत. तर प्रभाग क्र.१७८ मध्ये शिवसेना शिंदे गटाचे अमेय घोले हे माजी नगरसेवक आहे. या दोन्ही प्रभागांवर शिवसेना दावा करणार असल्याने राजा यांच्यासमोर पेच उभा राहिला आहे.
Snehal Ambekar : ठाकरेसेनेच्या तिघा दिग्गजांचे प्रभाग आरक्षित, मुंबईच्या माजी महापौर म्हणाल्या, आता माझ्यासमोर तीन पर्याय

शिवसेनेने आरक्षणात गड राखला

दरम्यान, मुंबई महापालिका निवडणुकीसाठीच्या प्रभाग आरक्षण सोडतीत उपमुख्यमंत्री एकनाथ शिंदे यांच्या नेतृत्वातील शिवसेनेने गड राखला आहे. शिवसेनेच्या ६३ पैकी बहुतांश माजी नगरसेवकांचे प्रभाग आरक्षण कायम राहिले आहे, तर केवळ १० माजी नगरसेवकांचे प्रभाग आरक्षण बदलले आहे. यापैकी नऊ नगरसेवकांचे प्रभाग खुल्या प्रवर्गातील महिलांसाठी आरक्षित झाले आहेत.