किरकोळ वादानं घेतलं भयानक रूप..
लखन घावट आपल्या मुलाच्या वाढदिवसाचा आनंद साजरा करण्यासाठी सहा मित्रांसह उदगाव येथील जॅकवेल परिसरात गेले होते. पार्टीदरम्यान झालेल्या किरकोळ वादाने आनंदी वातावरणाचे रूपांतर भीषण हाणामारीत झाले. वादात एका मित्राने लखन यांच्या डोक्यावर मोठा दगड फेकला. लखन गंभीर जखमी झाले असल्याने तात्काळ त्यांना सांगली सिव्हिल हॉस्पिटलमध्ये दाखल करण्यात आले, मात्र प्रकृती गंभीर असल्याने पुढे खासगी रुग्णालयात हलवण्यात आले. उपचारादरम्यान त्यांचा मृत्यू झाला. घटनेची माहिती मिळताच जयसिंगपूर पोलिस ठाण्याचे अधिकारी आणि कर्मचारी उदगावच्या जॅकवेल परिसरात पोहोचले आणि तात्काळ तपास सुरू केला.

चार आरोपींना अटक, दोघांचा शोध सुरू
या प्रकरणी अक्षय माने, संकेत हंबर, अमीन राजपूत, अमित सांगावकर, प्रथमेश ऊर्फ गोट्या पवार आणि अरविंद माळी (सर्व रा. जयसिंगपूर) यांच्या विरोधात जयसिंगपूर पोलिसात गुन्हा दाखल करण्यात आला आहे. घटनेनंतर सर्व मित्र पसार झाले होते; मात्र रात्री उशिरा चौघांना ताब्यात घेण्यात आले. अन्य दोघांचा शोध घेण्यासाठी पोलिसांची पथके रवाना झाली आहेत. या प्रकरणी योगेश सुरेश घावट यांनी पोलिसांत फिर्याद दिली असून, घटनास्थळी पोलिस निरीक्षक प्रवीण खानापुरे यांनी पाहणी केली.

परिसरात असुरक्षिततेची भावना
जयसिंगपूर परिसरात मागील काही दिवसांत खुनाच्या घटना वाढत आहेत. चार दिवसांपूर्वी ऐन दिवाळीत सुनील पाथरवट यांचा खून झाल्याची घटना ताजी असताना आता वाढदिवसाच्या पार्टीमधून लखन बागडीचा निर्घृण खून झाल्याने परिसरात असुरक्षिततेची भावना वाढीस लागली आहे. गेल्या नऊ महिन्यांत शिरोळ तालुक्यात नऊ खुनाच्या घटना घडल्याचे पोलिस सांगतात.

रक्ताच्या थारोळ्यात मृतदेह
उदगाव येथील जॅकवेल स्थान अत्यंत वर्दळीचे असून, जयसिंगपूर, संभाजीपूर आणि उदगाव या तीन गावांचे जॅकवेल येथे एकत्र आहेत. जागेच्या समीपच सांगली-कोल्हापूर महामार्ग असल्याने वर्दळ असते. रविवार दुपारी लखन यांचा मृतदेह रक्ताच्या थारोळ्यात पडलेला आढळून आला. पंचनामा, उत्तरीय तपासणी करून मृतदेह नातेवाइकांच्या ताब्यात देण्यात आला.

मैत्रीचं दुश्मनीत रूपांतर..
लखन बागडीने मुलाच्या वाढदिवसानिमित्त मित्रांसाठी पार्टीचे आयोजन केले होते. या आनंदमयी प्रसंगाला मित्रांनीच दुश्मनीचे रूप दिल्याची चर्चा आहे. दिवाळीसाठी नवीन कपडे घातलेले लखन हल्ल्यानंतर रक्ताने माखलेले दिसले. मित्रांच्या हातूनच घडलेल्या या घटनेमुळे परिसरात भीतीचे वातावरण आहे.

दरम्यान, या प्रकरणी जयसिंगपूर पोलीस कसून तपास करत आहेत. पोलिसांकडून सुरक्षेचे उपाय योजले जात असून उदगाव आणि जयसिंगपूर भागातील नागरिकांनी सतर्क राहण्याचं आवाहन करण्यात आलं आहे.