या घटनेविषयी सविस्तर माहिती अशी की जालना शहरातील जालना-अंबड राज्य महामार्गावर यशवंत नगर परिसरात तीन वर्षीय मुलीचा मृतदेह रक्ताच्या थारोळ्यात आढळून आला. परी दीपक गोस्वामी असं मयत मुलीचं नाव आहे. सकाळी 9 वाजताच्या सुमारास काही स्थानिक नागरिकांना हा प्रकार निदर्शनास आला. लेकीचा मृतदेह पाहून आई वडिलांनी एकच टाहो फोडला.

स्थानिकांनी तत्काळ घटनेची माहिती तालुका जालना पोलिसांना दिली. माहिती मिळताच पोलिस पथक तातडीने घटनास्थळी दाखल झालं. तोपर्यंत ही माहिती जालना शहरात वाऱ्यासारखी पसरली होती. निष्पाप चिमुकलीसोबत कोणी काय केलं असेल, तिच्यासोबत घातपात झाला असेल का, ही चर्चा सर्वत्र सुरु होती.

पोलीस अधीक्षक अजय कुमार बंसल, अपर पोलीस अधीक्षक आयुष नोपानी, उपविभागीय पोलिस अधिकारी अनंत कुलकर्णी, तालुका पोलीस ठाण्याचे पोलीस निरीक्षक संतोष साबळे यांनी तपासाची चक्रं फिरवत तात्काळ घटनास्थळी फॉरेन्सिक टीम पाठवली.
Nashik News : गर्दीने भरलेल्या ट्रेनमधून पडले नाहीत; तिघांनी रेल्वेसमोर उडी मारली, लोकोपायलटचा धक्कादायक उलगडा
पोलिसांनी घटनास्थळाची पाहणी करून तपास सुरु केला. प्रथमदर्शनी मुलीला भटक्या कुत्र्यांनी चावा घेऊन ठार केल्याची माहिती समोर आली आहे. पोलिसांनी परिसरातील सर्व सीसीटीव्ही छाननी सुरु केली आहे. मात्र ऐन दिवाळीत ही घटना घडल्याने संपूर्ण जालना शहरात हळहळ व्यक्त केली जात आहे.

परीचे वडील एका कंपनीमध्ये इंजिनियर म्हणून काम करतात, तर आई गृहिणी आहे. तिला सहा वर्षांची मोठी बहीण सुद्धा आहे. या हसत्या खेळत्या परिवाराला कुणाची नजर लागली आणि होत्याचे नव्हते झालं, अशी हळहळ व्यक्त केली जात आहे.
Matheran News : माथेरानमध्ये 1200 फूट खोल दरीत मोटिव्हेशनल स्पीकरची बॉडी सापडली, हॉटेलमधून बाहेर पडले अन्…
या सर्व प्रकरणाचा शोध पोलीस घेत असून लवकरच योग्य माहिती समोर येईल, असे तालुका पोलीस ठाण्याचे पोलीस निरीक्षक संतोष साबळे यांनी सांगितले. जालना महापालिकेच्या हद्दीमध्ये मोकाट जनावरे, मोकाट कुत्रे यांचा वावर मोठ्या प्रमाणात वाढला आहे.

दोन ते तीन महिन्यापूर्वी गांधीनगर भागात सुद्धा असेच एका चिमुरडीचा मोकाट कुत्र्यांनी लोचके तोडत जीव घेतला होता, तर आणखी एका चिमुरडीला तोंड व नाकाला कुत्र्यांनी चावा घेतला होता. मात्र प्रसंगावधान राखत शेजाऱ्यांनी तिचा जीव वाचवला. मात्र परीचा जीव मात्र या मोकाट कुत्र्यांनी घेतल्यामुळे महापालिका प्रशासनाच्या कामावर जालना शहरातील नागरिकांनी नाराजी व्यक्त केली आहे.