गंगापूमध्ये झालेल्या गोळीबार घटने प्रकरणी आता भाजप नेते सुनील बागूल यांचा पुतण्या अजय बागूल, पप्पू जाधव आणि अन्य एका आरोपीला अटक करण्यात आली आहे. यापूर्वी या प्रकरणात नुकताचं भाजपमध्ये प्रवेश केलेल्या मामा वाल्मिक उर्फ बाबासाहेब राजवाडे व इतरांना अटक झाली होती. पण, मुख्य आरोपी तुकाराम चोथवे आणि अजय बोरीसा अद्याप फरार आहेत.
शेतकऱ्यांना दिलासा द्या; दिवाळीपूर्वी 1 लाखाची मदत करण्याची उद्धव ठाकरेंची सरकारकडे मागणी

विसे मळा परिसरात झालेल्या गोळीबारप्रकरणी अटक केलेले सुनील बागूल समर्थक मामा राजवाडे आणि अमोल पाटील या दोघांना गुन्हे शाखेने अटक केली होती. त्यांना आता १३ ऑक्टोबरपर्यंत पोलीस कोठडी सुनावण्यात आली आहे. दरम्यान, राजवाडे यांनी पोलिसांनी मारहाण केल्याचा दावा करत न्यायालयात हजर होण्यापूर्वी अर्ज दाखल केला होता, पण वैद्यकीय तपासणीमध्ये तसे काही आढळले नाही.

अजय बागूलला घेतलं ताब्यात

संबंधीत प्रकरणात भाजप नेते सुनील बागूल यांचा पुतण्या अजय फरार होता. पोलिसांनी त्याचा शोध सुरू केला होता. अखेर त्याला ताब्यात घेण्यात आले आहे. अजय बागूल, पप्पू जाधवसह अजून एकाला पोलिसांनी अटक केली आहे. तर या प्रकरणातला मुख्य आरोपी तुकाराम चौथवे आणि अजय बोरिसा हे दोघे अद्याप फरार आहेत. त्यांचा शोध पोलिस घेत आहेत. यामध्ये पोलिसांना कधी यश मिळणार हे महत्त्वाचं ठरेल.

लोंढे टोळीही फरार

नाशिकमधल्या आयटीआय सिग्नल परिसरातही ऑरा बार बाहेर काही दिवसांआधी गोळीबाराची घटना घडली होती. याप्रकरणी रिपाइं पदाधिकारी प्रकाश लोंढे, दीपक लोंढे, भूषण लोंढे यांच्यासह इतर संशयितांवर गुन्हे दाखल करण्यात आलेले आहेत पण ते आरोपीही अद्याप फरार आहेत. त्यांनी वापरलेली वाहनं व गोळीबारात वापरलेली पिस्तूलही पोलिसांनी जप्त करुन घेतली आहे.

सदर घटनेत प्राथमिक तपासामध्ये ऑरा बारवरील कब्जा व खंडणी रक्कम तिप्पट करण्याच्या उद्देशाने लोंढे टोळीने हा गोळीबार केला होता अशी माहिती समोर आली आहे.