Kolhapur Fake Note Print Racket : कोल्हापूर पोलिस दलातील वाहन चालक हवालदार इब्रार इनामदारच्या “सिद्धलक्ष्मी अमृततुल्य चहा” दुकानात झेरॉक्स मशीनवर बनावट नोटांची छपाई करत असल्याचे समोर आले
मिरज-कोल्हापूर रस्त्यावर नीलजी बामणी पुलाजवळ 8 ऑक्टोबर रोजी एक व्यक्ती बनावट नोटा विक्रीसाठी आल्याची खात्रीशीर माहिती पोलिसांना मिळाली होती. सहायक निरीक्षक संदीप शिंदे यांच्या पथकाने छापा टाकत सुप्रीत काडापा देसाई याला 42 हजार रुपयांच्या बनावट नोटांसह ताब्यात घेतलं. चौकशीदरम्यान कोल्हापूर पोलिस दलातील वाहन चालक हवालदार इब्रार इनामदारच्या “सिद्धलक्ष्मी अमृततुल्य चहा” दुकानात झेरॉक्स मशीनवर बनावट नोटांची छपाई केल्याची माहिती मिळाली. कसबा बावड्यातील चहा दुकान इनामदार चालवत होता. कोल्हापुरात विविध ठिकाणी त्याच्या चहाची दुकानं आहेत. याच ठिकाणी रंगीत झेरॉक्स आणि प्रिंटर, पेपर कटरचा वापर करून बनावट नोटांचे छपाईचे काम चालू असल्याचे समोर आले.
18 कुटुंबांना एक कोटी मिळाले, इतरांना एक रुपयाही नाही, एअर इंडिया अपघातग्रस्त पाटील-सोनघरे कुटुंबीय म्हणतात, लेकी गेल्या अन्…
पोलिसांनी इनामदारच्या दुकानावर छापा टाकून 500 आणि 200 रुपयांच्या एकूण 1 कोटी रुपयांच्या बनावट नोटा, कलर झेरॉक्स, नोटा मोजायचे मशीन, स्कॅनर, प्रिंटर आणि एक वाहन असा 1 कोटी 11 लाख रुपये किमतीच्या मुद्देमालासह पाच आरोपींना ताब्यात घेतले आहे. अटक करण्यात आलेल्या आरोपींमध्ये इब्रार आदम इनामदार (मुख्य सूत्रधार), सुप्रीत काडापा देसाई, राहुल जाधव, नरेंद्र शिंदे आणि मुंबईतील सिद्धेश म्हात्रे यांचा समावेश आहे. न्यायालयाने या पाचही आरोपींना 13 ऑक्टोबरपर्यंत पोलिस कोठडी सुनावली आहे.
Navi Mumbai Airport : विमानतळाचं उद्घाटन पण ‘दिबां’च्या नावाची घोषणा नाही, कोण होते दि. बा. पाटील ?
या बनावट नोटांचे वितरण स्थानिक स्वराज्य संस्था निवडणुकीच्या पार्श्वभूमीवर होऊ शकते, अशी शक्यता वर्तवली जाते. पोलिस तपासात संशयितांकडून 500 रुपयांच्या प्रत्येक खऱ्या नोटेच्या बदल्यात तीन बनावट नोटा वितरीत केल्या जात असल्याचे स्पष्ट झाले आहे. आणखी काही संबंधित व्यक्तींचा शोध घेण्यासाठी पोलिसांचे पथक कार्यरत असून उर्वरित रॅकेटची पाळेमुळे उकरुन काढण्याचा संकल्प आहे.Crime News : कॅम्पसजवळून ओढत नेलं, MBBS च्या विद्यार्थिनीवर कॉलेज परिसरातच अत्याचार, वडील म्हणाले तिच्या मित्राचा फोन आला की…
पोलिस अधीक्षक संदीप घुगे यांच्या मार्गदर्शनाखालील या कारवाईमुळे मिरज आणि कोल्हापूर परिसरात बनावट नोटांची कारस्थानं मोठ्या प्रमाणावर उघडकीस आली आहे. कारवाईत सहभागी गांधी चौक पोलिस पथकाचा विशेष गौरव करण्यात आला असून, त्यांना पारितोषिक देण्याची घोषणा करण्यात आली आहे. या प्रकरणात कठोर कारवाई करून दोषींना शिक्षा केली जाणार असल्याचे पोलिस अधीक्षकांनी स्पष्ट केले आहे.
लेखकाबद्दलअनिश बेंद्रेअनिश सतीश बेंद्रे, महाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत आहेत. गेल्या तीन वर्षांपासून ते मटासोबत काम करत आहेत. राजकीय, गुन्हेगारी आणि मनोरंजन या विषयातील बातम्यांमध्ये त्यांचा विशेष हातखंडा आहे. ब्रेकिंग न्यूजसोबतच निवडणूक विषयक विश्लेषण करण्यात त्यांना अधिक रस आहे. त्यांनी झेविअर्स कॉलेजमधून मास कम्युनिकेशनचे पदव्युत्तर शिक्षण घेतले आहे. आतापर्यंत एबीपी माझा, टीव्ही9 मराठीसह पत्रकारिता क्षेत्रात 12 वर्षांहून अधिक काळचा अनुभव त्यांना आहे… आणखी वाचा